एजेन्सी – इटालियन फरवार्ड एन्टोनियो कासानो अरुको आलोचना गर्नबाट टाढै बस्न रुचाउँछन् । तर युभेन्ट्सका फरवार्ड क्रिस्टियानो रोनाल्डोका विषयमा भने उनले केहि कडा टिप्पणी गरेका छन् ।

व्यक्तिगत रुपमा पाँच पटकका बालोन डि ओर विजेता रोनाल्डाको प्रदर्शन सन्तोषजनक भएपनि युभेन्ट्सले उनलाई लिनुको उद्देश्य पूरा हुन नसकेको कासानोले बताएका छन् ।

‘युभेन्ट्सले च्याम्पियन्स लिग उपाधि जित्नका लागि रोनाल्डोलाई भित्राएको थियो । तर उनी आबद्ध भइसकेपछि विगतमा भन्दा पनि टोलीको प्रदर्शन कमजोर भएको छ,’ उनले थपे, ‘ उनी विना पनि युभेन्ट्सले सिरि ए उपाधि जितेको थियो । मलाई लाग्छ उनी यहाँ भने असफल भएका छन् ।’

१ सय २० वर्ष भन्दा लामो इतिहास भएको युभेन्ट्सले लिग उपाधि जितलाई मात्र चासो दिनु गलत भएको उल्लेख गर्दै कासानोले भने, ‘माउरिजियो सारी र आन्द्रे पिर्लोले त्यो परिचयलाई बदल्ने कोसिस गरेका छन् । उनीहरुले जितलाई भन्दा पनि खेल्ने शैलीलाई सुधार गर्न चाहेका छन् । तर रोनाल्डोले त्यो अनुसार आफूलाई ढाल्न सकेका छैनन् ।’

यद्दपी रोनाल्डो गोल गर्नमा भने सफल भइरहेको छन् । कासानोको नजरमा गोल कसरी गर्ने भन्ने उनलाई राम्ररी थाहा छ । ‘उनी बायाँबाट खेल्छन् र बल पाएपछि दायाँले गोल गर्ने प्रयास गर्छन्, उनले भने ।

‘तर पिर्लो खेललाई बुन्दै लान चाहन्छन् । लाइनबाट खेल्दै विपक्षीमाथि दबाब बढाउन चाहन्छन् । तर रोनाल्डो त्यस्तो गर्न सकिरहेका छैनन् । मलाई लाग्छ पछिल्लो तीन वर्ष रोनाल्डोका लागि उत्कृष्ट रहेन ।’