एजेन्सी – इंग्लिस प्रिमियर लिगमा लन्डन क्लब चेल्सी र म्यानचेस्टर युनाइटेडले गोलरहित बराबरी खेल्दै अंक बाँडेका छन् ।

चेल्सीको घरेलु मैदानमा आइतबार राति भएको खेलमा घरेलु टोलीले युनाइटेडलाई दवावमा राखेपनि गोल गर्न नसक्दा चेल्सी जितबाट वञ्चित बन्यो । युनाइटेडले पनि केही सुन्दर अवसर खेर फालेको थियो ।

खेलको ३१औं मिनेटमा ओलिभर जिरुउडको प्रहारलाई युनाइटेडका गोलरक्षक डेभिड हे गेयाले बचाए । ३५औं मिनेटमा कलुम हड्सन ओडोइको क्रसमा जिरुउडको डाइभिङ हेडरले पोस्टको दशा लिन सकेन ।

४८औं मिनेटमा बेन चिलवेलको क्रस पासमा हाकिम जियाचको प्रहारलाई गोलरक्षक डेभिड हे गेयाले नियन्त्रणमा लिन नसक्दा रिवाउन्डमा रिस जेम्सको प्रहार बाहिरिएको थियो ।

५९औं मिनेटमा मासन ग्रीनवुडको कर्नरमा ब्रुनो फर्नान्डेसको प्रहारले पोस्ट नजिकैबाट बाहिरियो । लगत्तै लुका साको क्रसमा आरोन वान बिशाखाको कट ब्याकमा स्कट म्याकटोमिनेको प्रहारलाई चेल्सीका गोलरक्षक इडुआर्ड मेन्डीले सहजै बचाए । इन्ज्युरी समयको थप गरिएको चौथो मिनेटमा फ्रेडको प्रहार बाहिरिदा युनाइटेड गोलबाट वञ्चित बन्यो ।

यो बराबरीपछि चेल्सीले चौथो स्थानमा उक्लने मौका गुमाएको छ । चेल्सी २६ खेलबाट ४४ अंक जोडेर पाँचौ स्थानमा यथावत रहेको छ । दोस्रो स्थानमा रहेको युनाइटेडको ५० अंक छ । युनाइटेड शीर्षस्थानको म्यानचेस्टर सिटीसँग १२ अंकले पछि छ । सिटीको ६२ अंक छ ।