काठमाडौं (हाम्रो खेलकुद)– दशरथ रंगशालामा मंगलबार सुरु हुने थ्री नेसन्स कपको प्रत्यक्ष प्रसारण नेपाल टेलिभिजन (एनटिभी) ले गर्ने भएको छ । नेपाल मेडिसिटी अस्पतालसँग आइतबार हस्पिटल पार्टरको सम्झौता पत्र हस्ताक्षर कार्यक्रममा अखिल नेपाल फुटबल संघ (एन्फा) का प्रवक्ता किरण राईले सो जानकारी दिएका हुन् ।

एनटिभीसँग हाम्रो यसअघिकै सम्झौता यथावत छ । त्यसैका आधारमा थ्री नेसन्स कपको प्रत्यक्ष प्रसारण हुनेछ,’ उनले भने,‘ यसअघिकै सम्झौतामा वर्षको ६ वटा अन्तर्राष्ट्रिय प्रतियोगिताको प्रत्यक्ष प्रसारण गर्ने सम्झौता भएको थियो । तर, पछिल्लो एक वर्ष कोभिडका कारण कुनै हुन सकेन ।’

एन्फा र नेपाल टएनटिभीबीच लिगसहित अन्तर्राष्ट्रिय खेलको प्रत्यक्ष प्रत्यक्ष प्रसारणको सम्झौता भएको थियो । बार्षिक ३५ लाख रुपैयाँ एनटिभीले एन्फालाई दिने गरि ३ वर्षका लागि सम्झौता भएको थियो । नेपालसहित बंगलादेश र कीर्गिस्तानको यू २३ टोली सम्मिलित थ्री नेसन्सको उद्घाटन खेल मंगलबा बंगलादेश र कीर्गिस्तानको युवा टोलीबीच हुनेछ ।

नेपाल र बंगलादेशबीच चैत १२ गते तथा नेपाल र कीर्गिस्तानबीच चैत १४ गते खेल हुनेछ । राउन्ड रोविन लिग पछि शीर्ष २ टोलीले चैत १६ गते फाइनल खेल्नेछ । सबै खेल फ्लड लाइडमा हुने एन्फाले यसअघि नै जानकारी दिएको छ ।

टिकट दर नघट्ने

एन्फाले टिकट दरमा पुर्नविचार नहुने प्रष्ट पारेको छ । एन्फाले दशरथ रंगशालाको भिआइपीतर्फ १ हजार ५ सय र साधारणतर्फ ७ सय रुपैयाँको टिकट दर तोकेको छ । टिकट महंगो भयो भन्ने आवाज उठेको छ नि भन्ने प्रश्नमा एन्फा प्रवक्ता राईको जवाफ थियो,‘ फुटबललाई व्यवसायिक बनाउँदै जानुपर्दछ भन्ने दबाब पनि त्यत्तिकै छ ।’

फुटबललाई व्यवसायिक बनाउँदै जाने अभियानमा टिकट दर विगतको तुलनामा केहि महंगो हुनुलाई स्वभाविक मान्नुपर्ने तर्क गर्दै राईले भने,‘ फुटबल प्रेमीले त्यो विषयलाई बुझ्नुभएको छ । ’ एन्फाले थ्री नेसन्स कपमा १ करोड रुपैयाँ खर्च र १ करोड ५० लाख रुपैयाँ आम्दानी हुने अनुमान गरेको छ ।

थ्री नेसन्स कपको विजेता ५ हजार र दोस्रो हुने टोली ३ हजार अमेरिकी डलर प्राप्त गर्ने एन्फाले यसअघि नै जानकारी गराइसकेको छ ।
प्रतियोगिताको उत्कृष्ट खेलाडीले ५ सय अमेरिकी डलर हरेक खेलको म्यान अफ दी म्याचले २ सय ५० अमेरिकी डरल प्राप्त गर्नेछन् ।