एजेन्सी – इंग्लिस प्रिमियर लिगमा टोटेनहम हटस्परले जित निकाल्दा आर्सनल बराबरीमा रोकिएको छ । टोटेनहमले एस्टन भिल्लालाई २–० ले पराजित गरेको हो ।

भिल्ला पार्कमा आइतबार राति भएको खेलमा टोटेनहमको जितमा कार्लाेस भिनिसियस र ह्यारी केनले गोल गरे । पहिलो र दोस्रो हाफमा समान १–१ गोल भएको थियो । खेलको २५औं मिनेटमा भिनिसियसको गोलबाट टोटेनहमले अग्रता लिएको थियो । उनले लुकास मोउराको पासलाई सदुपयोग गरेका थिए ।

६८औं मिनेटमा ह्यारी केनले पेनाल्टीमा गोल गर्दै टोटेनहमलाई २–० को जित दिलाए । पेनाल्टी बक्समा कासले केनलाई फल गरेपछि प्राप्त पेनाल्टीमा केन आफैले गोल गरेका थिए । जितपछि टोटेनहम २९ खेलबाट ४८ अंक जोडेर छैटौं स्थानमा रहेको छ । पराजित एस्टन भिल्ला ४१ अंक जोडेर १०औं स्थानमा रहेको छ ।

प्रिमियर लिगकै अर्काे खेलमा आर्सनल घरेलु टोली वेस्टह्याम युनाइटेडसँग ३–३ गोलको बराबरीमा रोकिएको छ । आर्सनलले ३–० ले पछि परेको अवस्थामा खेललाई बराबरीमा ल्याउन सफल भएको हो । वेस्टह्यामका जेसे लिङ्गार्ड जारोड बोवेन र थोमस सौसेकले गोल गर्दा आर्सनलले दुई आत्मघाती गोल उपहार पाउदा एलेसान्द्र लाकाजेटले गोल गर्दै आर्सनललाई हारबाट जोगाए ।

बराबरी पछि आर्सनल २९ खेलबाट ४२ अंक जोडेर नवौं स्थानमा रहेको छ । वेस्टह्याम ४९ अंक जोडेर पाँचौ स्थानमा रहेको छ ।