एजेन्सी – उमेरले ३६ वर्ष पुगेपनि क्रिस्टियानो रोनाल्डोले अहिले पनि आफूलाई गोल मेसिनकै रुपमा उभ्याउन सफल भएका छन् । युभेन्ट्सका लागि जारी सिजनमा ३४ खेल खेल्दै उनले ३० गोल गरिसकेका छन् ।

अघिल्लो सिजन ४७ खेलमा ३७ गोल गरेका रोनाल्डोले युभेन्ट्समा पहिलो सिजनमा ४३ खेलमा २८ गोल गरेका थिए । सन् २०१८ रियल म्याड्रिड छाडेर युभेन्ट्स पुगेयता उनले ९५ गोल गरिसकेका छन् । रोनाल्डोको अनुपस्थितिमा करिम बेन्जेमाले रियलको अग्रतपक्तिको मोर्चा सम्हालिरहेका छन् ।

‘म त्यति बेला पनि रोनाल्डो रियल छोडेर नजाउन् भन्ने चाहन्थे । उनी विश्वकै उत्कृष्ट खेलाडी मध्येका एक हन्’, रियलका कप्तान सर्जियो रामोसले पूर्व सहकर्मीका बारेमा केहि अघि भनेका थिए, ‘रोनाल्डो टोलीमा हुनु भनेको जितको नजिक पुग्नु हो । उनले रियल र रियलले उनलाई गुमायो । जितका लागि उनीका लागि सहयोग गर्ने महत्वपूर्ण खेलाडी हुन् ।’

रियलका प्रशिक्षक जिनेजिन जिदानले भने रोनाल्डो पुनः रियलमा फर्कन सक्ने संकेत गरेका छन् । ‘उनको फिर्ता सम्भव छ,’ उनले रोनाल्डोको पुनरागमनबारे सोध्दा सहजै जवाफ दिएका थिए । रोनाल्डोले पनि युभेन्ट्सको आफ्नो यात्रा टुंगने क्रममा रहेको बुझेको मानिएको छ ।

रियल फर्कनका लागि उनले इटालियन टोली छाड्ने सम्भावना रहेको अड्कल केहि अघिबाट चल्दै आएको छ । रियल छाडेर उनी टुरिन जानुको मुख्य उद्देश्य युभेन्ट्सलाई च्याम्पियन लिग उपाधि जित्नु थियो । तर त्यो सम्भव भएन । अझ यसपटक पनि टोली क्वार्टरफाइनल पुग्न सकेन ।

यी सबै कारणले रोनाल्डोले युभेन्ट्स छाड्ने सम्भावना बढी रहेको जनाएको छ । रियल र रोनाल्डो दुवैलाई थाहा २०१८ को परिस्थितिमा अहिले भने फरक परिसकेको छ । रोनाल्डोलाई भित्राएपनि युभेन्ट्सको योजना भने सफल हुन सकेन । युभेन्ट्सले यो सिजन सिरिएमा ११ खेल खेल्न बाँकी छ ।

टोलीले सिरिएको उपाधि जित्ने सम्भावना कमजोर भइसकेको छ । च्याम्पियन्स लिगबाट बाहिरिसकेको छ भने यो वर्ष कोपा इटालियाको उपाधिको सम्भावना मात्र बाँकी रहेको छ । टोलीले एटलान्टासँग कोपाको फाइनल खेल्नेछ ।