नेपालगन्ज (हाम्रो खेलकुद) – लुम्बिनी प्रदेश च्याम्पियन धम्बोझी र गण्डकी प्रदेशको च्याम्पियन त्रिवेणी युवा क्लब लमजुङले एन्फा प्रेसिडेन्ट लिगमा बुधबार जित हासिल गरेका छन् ।

धम्बोझीले धादिङ समाज धादिङलाई २–१ ले हराएको छ । नेपालगन्ज रंगशालामा बुधबार भएको खेलमा धम्बोझीको जितमा दुवै गोल निशान लिम्बुले गरे । उनले खेलको दोस्रो मिनेटमा गोल गर्दै धम्वोजीलाई अग्रता दिलाएका थिए । १६औं मिनेटमा विजय भुजेलको गोलबाट धादिङ खेलमा फर्किएको थियो । ६१औं मिनेटमा निशानले गोल गर्दै धम्वोजीलाई २–१ को जित दिलाए । निशान खेलको खेलमा म्यान अफ द म्याच घोषित भए ।

जितसँगै धम्बोझीले ९ अंक जोडदै लिगको शीर्ष चारमा पर्ने सम्भावनालाई जिवितै राखेको छ । अंक तालिकामा १० अंक सहित स्टार सिटी कैलाली शीर्ष स्थानमा छ । त्रिवेणी र धम्बोझीको समान ९ अंक छ । गोलअन्तरमा त्रिवेणी दोस्रो स्थानमा छ ।

यसैगरी नेपालगन्ज रंगशालामा भएको अर्को खेलमा त्रिवेणी युवा क्लब लमजुङले सैनिक फुटबल क्लब झापालाई २–० ले हरायो । त्रिवेणीको जितमा लक्ष्मण रुचाल र बिमल रानाले गोल गरे । लक्ष्मणले ६१औं मिनेटमा गोल गरेका थिए भने बिमलले ७८औं मिनेटमा गोल गरे । त्रिवेणीका लक्ष्मण रुचाल म्यान अफ द म्याच घोषित भए ।

जितसँगै त्रिवेणीले ४ खेलबाट ९ अंक जोडेर दोस्रो स्थानमा उक्लिएको छ । शीर्ष स्थानको स्टार सिटी युवा क्लब कैलालीको १० अंक छ । पराजित सैनिकको ४ अंक छ ।

चैतको १५ गते सम्म चल्ने प्रतियोगितामा सात प्रदेशका च्याम्पियन सात टोलीको सहभागिता रहेको छ । प्रतियोगिताको विजेताले १० लाख रुपैयाँ र उपविजेता टोलीले ५ लाख रुपैयाँ पाउनेछन् । प्रतियोगिताको शिर्ष चार टोलीले राष्ट्रिय लिगमा प्रतिस्पर्धा गरिरहेका छन् ।