विराटनगर (हाम्रो खेलकुद) – सशस्त्र प्रहरी बल पूर्वाञ्चल प्रथम मिल्स गोल्ड कप फुटबल प्रतियोगिताको फाइनल पुगेको छ । एलेभन एरोज क्लब दुहबी सुनसरीलाई टाइब्रेकरमा ३–२ ले हराउँदै सशस्त्र प्रहरी बल उपाधि नजिक पुगेको हो ।

रानी विराटनगरमा बुधबार निर्धारित समय २–२ को बराबरीपछि टाइब्रेकरमा सशस्त्रले बाजी मारेको थियो । सशस्त्रका लागि राज कुमार कन्दड्गवा, विमल तामाङ र नवीन चौधरीले गोल गरेका थिए । उज्वल राईको प्रहारलाई एलेभन एरोजका गोलकिपरले रोक ।

समिर राईको प्रहार बाहिरिएको थियो । एलेभम एरोजका लागि शंकर चौधरी र उमेश कार्कीले मात्र गोल गर्न सके । कविन्द्र चौधरीको प्रहार सशस्त्रका गोलकिपरले रोके भने विवेक पौडेल र सुमन चौधरीको प्रहार बाहिरिएको थियो ।

११ औं मिनेटमा विवेक पौडेलको पेनाल्टी गोलबाट एलेभन एरोजले खेलमा अग्रता लिएको थियो । अरुण राईले ४६ औं मिनेट सशस्त्रका लागि बराबरी गरे । ६१ औं मिनेटमा उज्वल चाम्लिङ राईको गोलबाट सशस्त्रले अग्रता लिएको थियो । दीनेश राईले इन्जुरी समयको तेस्रो मिनेटमा एलेभन एरोजका लागि बराबरी गोल गरेपछि खेल टाइब्रेकरमा पुगेको थियो ।

सशस्त्रका उज्वल खेलको म्यान अफ दी म्याच घोषित भए । उनलाई विराटनगर महानगरपालिका वडा नं १७ का समिन कमरले ५ हजार र मेडल हस्तान्तरण गरे । प्रतियोगिताको दोस्रो तथा अन्तिम सेमिफाइनलमा बिहीबार साइने स्पोर्टस क्लब रानी विराटनगर र धरान सिटी फुटबल एकेडेमी सुनसरीबीच प्रतिस्पर्धा हुनेछ ।

मिल्स गोल्ड कप फुटल ट्रष्टले आयोजना गरेको प्रतियोगितालाई विराटनगर महानगरपालिकाको संयोजन र प्रदेश १ सरकारले प्रवद्र्धन गरेको छ । त्यस्तै मोरङ जिल्ला फुटबल संघले प्रतियोगितामा प्राविधिक सहयोग गरेको छ ।