नेपालगन्ज (हाम्रो खेलकुद) – मनकामना युवा क्लब रौतहटसँग त्रिवेणी युवा क्लब लमजुङ २–१ ले पराजित भएपछि सुदुर पश्चिमको स्टार सिटी युवा क्लब कैलाली एक खेल अगावै एन्फा प्रेसिडेन्ट लिग च्याम्पियन बनेको छ ।

५ खेल खेलेको स्टारको १३ अंक छ । अब स्टारले आफनो अन्तिम खेल त्रिवेणीसँग खेल्नेछ । त्यो खेलको नतिजा जे आएपनि स्टार सिटी शिर्ष स्थानमा रहँदै च्याम्पियन बनेको हो । त्रिवेणीले ५ खेलमा ३ जित २ हारको सामना गर्दै ९ अंक जोडेको छ । मनकामनाले ५ खेलमा २ जितसहित ६ अंक बनाएको छ ।

शुक्रबार मनकामनाको जितमा भुवन बस्नेतले दुवै गोल गरे । त्रिवेणीका अभिषेक लिम्बुले एक गोल फर्काए । खेलको नबौं मिनेटमा भुवनको गोलबाट मनकामनाले अग्रता लिएको थियो । २९औं मिनेटमा अभिषेक लिम्बुले गोल गर्दै खेललाई १(१ गोलको बराबरीमा ल्याए । ५८औं मिनेटमा भुपनले पेनाल्टीमार्फत गोल गर्दै मनकामनालाई २–१ को जित दिलाए ।

अर्को खेलमा प्रदेश नम्बर १ को सैनिक युथ क्लब झापाले बागमति प्रदेशको धादिङ समाज धादिङलाई २–० ले पराजित गरेको छ । सैनिकको जितमा जीवन गुरुङ र सुरज ज्यु ठकुरीले गोल गरे ।

प्रतियोगिता अन्तर्गत शनिबार लुम्बिनी प्रदेशको धम्बोझी क्लब र कर्णालीको लेकाली युवा क्लब जुम्लाबिच प्रतिस्पर्धा हुनेछ । प्रतियोगिताको विजेताले १० लाख रुपैयाँ र उपविजेता टोलीले ५ लाख रुपैयाँ पाउनेछन् । यस प्रतियोगिताको शिर्ष चार टोलीले राष्ट्रिय लिगमा प्रतिस्पर्धा गर्न मौका पाउनेछन् ।