एजेन्सी – इंग्लिस क्लब म्यानचेस्टर सिटीका अर्जेन्टिनी फरवार्ड सर्जियो अगुइरोले सिजनको अन्त्यसँगै क्लब छाड्ने भएका छन् ।

इंग्लिस क्लब म्यानचेस्टर सिटीले आफ्नो सर्वाधिक गोलकर्ता अगुइरोले सिजनको अन्त्यसँगै क्लब छाड्ने जनाएको छ । अगुइरोको सिटीसँगको सम्झौता यो सिजनको अन्त्यसँगै सकिदैछ । ३२ वर्षीय अगुइरो सिटीका सर्वाधिक गोलकर्ता खेलाडी हुन् ।

उनले सिटीका लागि ३ सय ८४ खेलमा २ सय ५७ गोल गरेका छन् । प्रिमियर लिगमा उनले १ सय ८१ गोल गरेका छन् । अगुइरो सन् २०११ मा स्पेनिस क्लब एट्लेटिको म्याड्रिडबाट सिटीका आएका थिए । सिटीका लागि ४ प्रिमियर लिगको उपाधि जितेका छन् । यस्तै उनले एक एफए कप, दुई कम्युनिटी शिल्ड र पाँच लिग कप जितेका छन् ।

अगुइरोको सम्मानमा क्लबले रंगशालामा परिसरमा उनको शालिक खडा गर्ने भएको छ । क्लबले यसअघि ऐतिहासिक सफलता दिलाउने कप्तान भिन्सेन्ट कम्पनि र डेविड सिल्भालाई पनि सम्मानस्वरूप शालिक राखेको थियो । सन् २०१९ मा क्लब छाडेका कम्पनि र गतवर्ष प्रस्थान गरेका सिल्भासँगै अब अगुइरोको पनि शालिक क्लबमा रहनेछ ।

अगुइरोले सन् २०१२ को प्रिमियर लिग सिजन अन्तर्गत इन्ज्युरी समयको अन्तिम मिनेटमा क्विन्स पार्क रेन्जर्स (क्युपिआर) विरुद्ध गरेको गोल विश्व फुटबलकै उत्कृष्ट क्षणमा गनिन्छ । अगुइरोको उक्त गोलसँगै सिटीले ४४ वर्षपछि लिग उपाधि जितेको थियो ।

अगुइरोको आगामी गन्तव्य कता हुन्छ भन्ने चर्चा पनि सुरु भएको छ । धेरैले उनलाई आफ्ना राष्ट्रिय टोलीका सहकर्मी लिओनेल मेस्सीसँग बार्सिलोना पुग्ने आँकलन गरेका छन् । मेस्सी आफैं बार्सिलोना छाड्ने सम्भावना रहेकाले अगुइरोलाई पेरिस सेन्ट जर्मेन, युभेन्टस, इन्टर मिलान लगायत क्लबले पनि चासो देखाएका छन् ।