एजेन्सी – कप्तान तथा फरवार्ड ह्यारी केन र डिफेन्डर ह्यारी मगाएरको गोल मद्दतमा इंग्ल्यान्डले फिफा विश्वकप कतार २०२२ को युरोपियन छनोट खेलमा लगातार तेस्रो जित दर्ता गर्दा पोल्यान्डलाई २–१ ले पराजित गरेको छ ।

वेम्वली स्टेडियममा बुधबार राति भएको खेलका पोल्यान्डका जाकुव मोडेरले एक गोल फर्काए । खेलको १९औं मिनेटमा कप्तान ह्यारी केनको पेनाल्टी गोलबाट इंग्ल्यान्डले अग्रता लिएको थियो । पेनाल्टी बक्समा रहिम स्टर्लिङलाई मिचल हेलिकले लडाएपछि रेफ्रीले इंग्ल्यान्डलाई पेनाल्टी प्रदान गरेको थियो ।

५८औं मिनेटमा जाकुव मोडेरले गोल गर्दै खेललाई १–१ गोलको बराबरीमा ल्याए । उनले अर्काडिउस मिलिकको पासलाई सदुपयोग गरेका थिए । ८५औं मिनेटमा ह्यारी मगाएरले जोन्स स्टोन्सको पासमा गोल गर्दै इंग्ल्यान्डलाई २–१ को जित दिलाए । पोल्यान्ड आफ्नो कप्तान तथा फरवार्ड रोबर्ट लेवान्डोस्की नहुदा केही फितलो देखिएको थियो ।

यही समूह ‘आई’ को अर्काे खेलमा हंगेरीले एन्डोरालाई ४–० ले तथा अल्वानियाले सानमारिनोलाई २–० ले पराजित गरेको छ । यो नतिजापछि लगातार तीन खेलमा जित निकालेको इंग्ल्यान्ड ९ अंक जोडेर शीर्षस्थानमा रहेको छ ।

हंगेरी ७ अंक जोडेर दोस्रो स्थानमा तथा अल्वानिया ६ अंक जोडेर तेस्रो स्थानमा उक्लिएको छ । इंग्ल्यान्डसँग पराजित भएको पोल्यान्ड ४ अंक जोडेर चौथो तथा अंकविहीन एन्डोरा र सान मारिनो पाँचौ र छैटौ स्थानमा रहेको छ ।