एजेन्सी – सिजनको दोस्रो ‘एल क्लासिको’ अर्थात रियल म्याड्रिड र बार्सिलोनाबीचको खेल आज राति रियलको मैदान अल्फ्रेडो डि स्टेफानोमा हुदैछ ।

खेल नेपाली समयअनुसार राति १२ः४५ बजे हुनेछ । घरेलु मैदानमा हुने खेलमा रियल बार्सिलोनालाइ हराउँदै स्पेनिस ला लिगाको उपाधि होडमा उभिन चहान्छ । बार्सिलोनालाई हराउन सके रियलले शीर्षस्थानको एट्लेटिको म्याड्रिडसँगको अंक दुरी बरारी गर्नेछ । तर, गोल अन्तरमा रियल दोस्रो स्थानमा रहनेछ । बराबरीले रियल तेस्रो स्थानमा यथावत रहँदा शीर्षस्थानको एट्लेटिको र बार्सिलोनासँग २ अंकले पछि पर्नेछ ।

तर, रियल बार्सिलोनालाई हराउँने लक्ष्यमा मैदानमा उत्रनेछ । टोलीसँग करिम बेन्जेमा, भिनिसियस जुनियर, टोनी क्रुस, लुका मोड्रिच, क्यासमिरो, फेडे भाल्भेर्डे, फर्लान्ड मेन्डी, नाचो फर्नान्डेज, इडर मिलिसाओ, लुकास भास्क्वेज र गोलरक्षक थिवाउट कोर्टुवाको साथ रहेको छ ।

यस्तै इस्को, रोड्रिगो गाएस र मार्काे एसेन्सियो टोलीमा रहँदा चोटका कारण कप्तान सर्जियो रामोस, राफयल भरान, ड्यानी कार्भाहल र इडेन हाजार्ड टोलीमा हुनेछैनन् ।

अनुभवी डिफेन्डर रामोस, भरान र कार्भाहल टोलीमा नरहँदा रियललाई समस्या हुन सक्नेछ । तर उनीहरुको स्थान नाचो फर्नान्डेस, इडर मिलिसाओ, फर्लान्ड मेन्डी र मार्सेलोले सम्हाल्नेछन्।

यता, बार्सिलोना पनि रियललाई उसकै मैदानमा हराउँदै कम्तीमा एक दिनको लागि शीर्षस्थानमा उक्लने दाउमा हुनेछ । रियललाई हराउन सके बार्सिलोनाले शीर्षस्थानमा एट्लेटिकोलाई २ अंकले पछि पार्नेछ । रियलसँगको बरीबरीले पनि बार्सिलोनाले एट्लेटिकोसँग अंक बराबरी गर्दै गोल अन्तरमा शीर्षस्थानमा उक्लनेछ ।

बार्सिलोनासँग मार्क आन्द टेर स्टेगन, सर्जिनो डेस्ट, रोनाल्ड एराउजो, क्लेमेन्ट लेङ्लेट, जोर्डी अल्वा, सर्जि रोबर्टाे, ओस्कार मिगुइजा, सर्जियो बुस्क्वेट्स, मिरालेम प्यानिच, पेड्री, फ्रान्की डि योङ, एन्टोइन ग्रिजमन, लियोनेल मेस्सी र औसमाने डेम्वेले रहेका छन् ।

ट्रिन्काओ, जेरार्ड पिके स्यामुइल उम्टिटी, जुनियर फिर्पाे, रिकी पुच, मोरिवा र मार्टिन ब्रेथवेट पनि टोलीमा रहेका छन् । चोटका कारण अन्सु फाती, नेटो र फिलिपे कौटिन्हो टोलीमा हुने छैनन् । रियलविरुद्ध मेस्सी नै बार्सिलोनाको मुख्य हतियार हुनेछ । मेस्सीले २०१८ मेमा भएको खेलमा रियलविरुद्ध गोल गरेपछि पछिल्लो ६ खेलमा गोल गर्न सकेका छैनन् । उनी रियलविरुद्धको गोलको खडेरी अन्त्य गर्ने दाउमा हुनेछ ।

बार्सिलोनाले पछिल्लो तीन खेलमा रियललाई पराजित गर्न सकेको छैन । जसमा २ हार र १ बराबरीको नतिजा छ । पछिल्लोपटक रियलले बार्सिलोनालाई उसकै मैदानमा ३–१ को जित निकालेको थियो । त्यसअघि रियलले बार्सिलोनालाई २–० ले पराजित गरेको थियो ।

यि दुई टोलीबीचको पछिल्लो ३८ खेलको नतिजामा बार्सिलोना १६ खेलमा विजयी भएको छ । १२ खेल रियलले आफ्नो पक्षमा पार्दा १० खेल बराबरीमा टुंगिएको छ ।

लिगको २९औं चरणको खेल सकिदा एट्लेटिको ६६ अंक जोडेर शीर्षस्थानमा रहेको छ । बार्सिलोनाको ६५ तथा रियलको ६३ अंक छ ।