एजेन्सी – स्पेनिस टोली रियल म्याड्रिडका प्रशिक्षक जिनेदिन जिदानले सम्झौता नथप्ने निर्णय लिएसँगै अब टोली नयाँ प्रशिक्षकको खोजीमा छ । रियलले मासिमिलानो एलेग्रीलाई पहिलो विकल्पको रुपमा लिएको छ ।

युभेन्टसका पूर्व प्रशिक्षक एलेग्री पछिल्लो समय कुनै क्लबसँग आबद्ध छैनन् । तर उनलाई इटालीका ठूला क्लबले अर्को सिजनका लागि सम्पर्क गर्न थालिसकेका छन् । यस्तो अवस्थामा उनले रियलको अवस्था के हुन्छ थाहा भएपछि मात्र निर्णय लिने बुझिएको छ ।

एलेग्रीले युभेन्टसमा रहँदा निकै सफल कार्यकाल बिताएका थिए । उनले घरेलु प्रतियोगितामा लगातार उपाधि जित्दा युरोपमा भने सफल रहन सकेनन् । त्यसैले उनले युभेन्टसमा यात्रा टुंग्याएका थिए । तर उनको प्रस्थानपछि क्लबले लय गुमाउन पुग्यो । युभेन्टसले पनि उनको अवस्थाबारे चासो राखेको छ ।

च्याम्पियन इन्टर मिलानले पनि एलेग्रीको अवस्थाबारे नजिकबाट बुझ्न थालेको छ । एन्टोनियो कोन्टेले उपाधि जितेलगत्तै क्लब छाडेपछि अहिले इन्टर नयाँ प्रशिक्षकको खोजीमा छ । र एलेग्रीको नाम नै टोलीको लागि पहिलो रोजाई छ । यता रियलका लागि एलेग्री नआएको खण्डमा कोन्टे पनि विकल्पका रुपमा अघि आएका छ ।

रियलले जिदानको निर्णयपछि मात्र अन्य विकल्प खोज्ने बताएको थियो । जिदानले आफू निरन्तरता नदिने बताएसँगै अब एलेग्रीका लागि रियलले प्रस्तावको तयारी गरिसकेको छ । एलेग्री र कोन्टेबाहेक रियलका लागि राउल गोन्जालेज पनि विकल्प हुन सक्छन् । जिदानले जसरि नै राउल पनि क्लबमा खेलाडीको रुपमा लामो समय बिताएपछि अहिले दोस्रो टोलीलाई प्रशिक्षण दिइरहेका छन् ।

यो पनि : जिदान रियलका सर्वाधिक सफल प्रशिक्षक