त्तएजेन्सी – इडन हाजार्डको रियल म्याड्रिडमा भविष्यका के हुने भन्ने रहस्यमा छ । तर टोलीका गोलकिपर थियाबाउट कोर्टुवाले भने हाजार्ड आउने सिजन हाजार्ड रियलमै रहने बताएका छन् ।

केहि सञ्चारमाध्यमले रियलले हाजार्डलाई विक्री गर्न सक्ने उल्लेख गरिरहेका उनका बेल्जियम राष्ट्रिय टोली तथा रियलका सहकर्मी कोर्टुवाले उनी रियलमै रहनेमा आफूलाई कुनै शंका नरहेको बताएका छन् । ‘म शतप्रतिशत पक्का छु । उनी यहि रहनेछन् । उनी छाड्न चाहिरहेका छैनन् ,’ उनले भने,’ म्याड्रिडको प्रेसले मात्र उनले रियल छाड्न चाहेको लेखिरहेका छन् । उनी यहाँ रहन चाहन्छन् । चोट मुक्त भएर खेल्दै उपाधि जित्न चाहन्छन् ।’

रियलमा हरेक खेलाडीको आलोचना हुने पनि कोर्टुवाले प्रष्ट पारेका छन् । ‘ग्यारेथ बेलको पनि आलोचना हुन्थ्यो । तर उनले किभमा भएको च्याम्पिन्स लिगको फाइनलमा २ गोल गरेका थिए । लिस्बनको फाइनलमा उनले मलाई पनि गोल गरेका थिए,’ उनले भने, ‘हामी सबैलाई थाहा छ म्याड्रिडमा प्रेस र समर्थकबाट दबाब र आलोचना हुने गर्छ । तर हाजार्डले त्यो सम्हाल्नेछन् । म उनलाई राम्ररी जान्दछु । अझै पनि उनले धेरै परिवर्तन गर्न सक्छन् ।’

आफूबीचमा रियलमा सँगै खेल्ने बीचमा पनि कुराकानी भइराख्ने पनि कोर्टुवाले बताए । ‘उनी अहिले पनि रियलको महत्वपूर्ण खेलाडी बन्न चाहन्छन् र उपाधि जित्न चाहन्छन् । यो सिजन उनले अहिले जिममा मेहनत गरेका थिए र अहिले एकदम ठिक छन्,’ उनले थपे, ‘शरीरिक रुपमा उनी पहिला भन्दा पनि बलियो भएका छन् । विगतमा राष्ट्रिय टोली र चेल्सीमा भए जस्तै प्रशिक्षणमा पनि राम्रो गरिरहेका छन् ।’

यसै साता सुरु हुने युरोमा हाजार्डले राम्रो गर्न सकेको खण्डमा त्यो राष्ट्रिय टोली र रियलका लागि आउने सिजनका लागि राम्रो हुने कोर्टुवाको बुझाइ छ ।