एजेन्सी – इंग्लिस क्लब लिभरपुलका डच मिडफिल्डर जर्जिन्हो वाइनाल्डम फ्रान्सेली क्लब पेरिस सेन्ट जर्मेन (पीएसजी) मा अनुबन्ध नजिक पुगेका छन् ।

पीएसजीले क्याटलान क्लब बार्सिलोनालाई पछि पार्दै ३० वर्षीय मिडफिल्डर अनुबन्ध नजिक पुगेको हो । वाइनाल्डम यो सिजनको अन्त्यसँगै स्वतन्त्र छन् । वाइनाल्डम आफ्नो डच पुर्व प्रशिक्षक प्रशिक्षक रहेको क्याटलान क्लब बार्सिलोनामा जाने अपेक्षा गरिएपनि बार्सिलोना अन्तिम समयमा सफल हुन सकेन । पिएसजीले अन्तिम समयमा उनलाई सम्पर्क गर्दै प्रक्रिया अघि अब्धाएको थियो ।

पीएसजीका प्रशिक्षक मौरिसियो पोचेटिनोले वाइनाल्डम अनुबन्धको लागि व्यक्तिगत रुपमा नै प्रयास थालेका थिए । रिपोर्ट अनुसार पीएसजीले वाइनाल्डमसँग ३ वर्षको लागि अनुबन्ध गर्नेछ । उनको मेडिकल हुन बाँकी छ । वाइनाल्डम अनुबन्धको लागि जर्मन च्याम्पियन बायर्न म्युनिखसँगै बार्सिलोनाले पनि चासो देखाएको थियो । पीएसजीको प्रस्तावअघि वाइनाल्डमले बार्सिलोना जान मौखिक सहमति गरिसकेको खबर सार्वजनिक भएको थियो ।

मुन्डो डेपोर्टिभोको पहिलो पृष्ठमा वाइनाल्डमको लागि पीएसजीले बार्सिलोनाले भन्दा दोब्बर बढी मुल्यको प्रस्ताव गरेको उल्लेख छ । वाइनाल्डमका डच सहयात्री मेम्फिस डिपाए भने फ्रि ट्रान्सफरमा बार्सिलोना जाने चर्चा छ । बार्सिलोनाका अधिकांश खेलाडीले क्लबमा आफ्नो पारिश्रमिक घटाएका छन् ।

बार्सिलोनाले प्रशिक्षक रोनाल्ड कोम्यान र वाइनाल्डमलाई पुर्नमिलन गराउने सम्भावना बढाएको थियो । प्रशिक्षक कोम्यानका सम्झौता अवधि थपिदा वाइनाल्डम अनुबन्धको सम्भावना भने टाढिएको छ । राष्ट्रिय टोलीबाट ७५ क्याप जितेका वाइनाल्डमले आगमी युरोकपमा फ्रान्क डे बोयरको नेतृत्वमा खेल्नेछन् । नियमित कप्तान भर्जिल भान डाइकको अनुपस्थितिमा वाइनाल्डमले नै डच टोलीको नेतृत्व सम्हाल्ने देखिएको छ ।

२०१६–१७ को सिजनमा न्यु क्यासलबाट लिभरपुल आएर पाँच सिजन बिताउँदा वाइनाल्डमले २३७ खेलमा २२ गोल गरेका छन् । उनले यो सिजन लिभरपुलबाट ५१ खेल खेल्दै ३ गोल गरेका छन् । उनले डच टोलीबाट ७४ खेलमा २२ अन्तर्राष्ट्रिय गोल गरेका छन् । वाइनाल्डमले लिभरपुलबाट समान एकपटक च्याम्पियन्स लिग, प्रिमियर लिग, युएफए सुपर कप र फिफा क्लब विश्वक जिते ।