एजेन्सी – चिर परिचित प्रतिद्वन्द्वी मेक्सिकोलाई पराजित गर्दै अमेरिकाले कन्काकाफ नेसन्स लिगको पहिलो संस्करणको उपाधि जितेको छ । अतिरिक्त समयसम्म लम्बिएको खेलमा ३-२ को जित दर्ता गर्दै अमेरिकाले सन् २०१७ यता उपाधि जित्ने सफल रहयो ।

कप्तान क्रिस्टियन पुलिसिचले अतिरिक्त समयको दोस्रो हाफमा पेनाल्टीमार्फत गोल गर्दै जित सुनिश्चित गरेका थिए । खेलमा मेक्सिकोले दुई पटक अग्रता लिएपनि युवा खेलाडीले भरिपूर्ण अमेरिका खेलमा फर्कन सफल भएको थियो । खेलको दुवै हाफमा अमेरिकाले बराबरी गोल फर्काएको थियो ।

दोस्रो मिनेटमा जेसस कोरोनाले गोल गर्दै मेक्सिकोलाई अग्रता दिलाएका थिए । सेन्टर डिफेन्डर मार्क मकेन्जीको पासलाई नियन्त्रणमा लिँदै कोरोनाले गोल गरेका थिए । खेलको २७ औं मिनेटमा जर्मन क्लब बोरुसिया डर्टमुन्डबाट खेल्दै आएका मिडफिल्डर जिओ रेयनाले गोल गर्दै खेल बराबरीमा ल्याए ।

दोस्रो हाफमा मेक्सिकोले ७९ औं मिनेटमा अग्रता लियो । वैकल्पिक खेलाडी डिएगो लाइनेजले गोल गरेका थिए । तर त्यसको तीन मिनेट नबित्दै अमेरिका बराबरीमा आयो । युभेन्टसका मिडफिल्डर वेस्टन मकेनीले गोल गर्दै खेललाई अतिरिक्त समयमा धकेले ।

ुलिसिचले १ सय १४ औं मिनेटमा आफैंले जितेको पेनाल्टीमा गोल गरे । तर त्यसको केहि मिनेटमा नै मेक्सिकोले पेनाल्टी प्राप्त गर्यो । आन्द्रेस गुआर्डाडोको प्रहार गोलरक्षक होर्भाथले बचाउँदै अमेरिकाको जित पक्का गरे । यसअघि अमेरिकाले सन् २०१७ मा गोल्ड कप पनि जितेको थियो ।