एजेन्सी – रियल म्याड्रिडका रक्षक राफेल भारेनको प्रतिनिधिले यो साता म्यानचेष्टर युनाइटेडसँग छलफल गर्ने भएका छन् । त्यो भेटमा भारानको प्रिमियर लिग टोलीमा आबद्ध हुने टुंगो लाग्ने अनुमान गरिएको छ ।

सेन्टर डिफेन्डर भारानको रियलमा अझै एक वर्षको सम्झौता बाँकी छ । सम्झौता नविकरण नगरे उनी अर्को सिजन फ्रि ट्रान्सफरमा क्लब छाड्न पाउनेछन् । तर भारानले दुवै पक्षलाई फाइदा हुने भन्दै यसै ट्रान्सफर विन्डोमा रियल छाड्न चाहेको बताइएको छ । इंग्ल्यान्डका सञ्चारमाध्यमले भारान रियलमा खुसी नरहेको उल्लेख गरेका छन् । नयाँ सम्झौताका लागि लुका मोड्रिच, लुकास भाज्क्वेज र सर्जियो रामोसकै अवस्था हुन सक्ने अनुमानका साथ भारेन रियल छाड्न चाहिरहेका छन् ।

मोड्रिच र भाज्क्वेजले रियलसँग नयाँ सम्झौता गरेपनि सम्झौता अवधिका बारेमा सहमति नभएपछि रामोसले गत साता मात्र क्लब छाड्ने निर्णय लिएका थिए । फ्रान्सेली रक्षकको चाहना अनुसार युनाइटेड उनका लागि उपयुक्त गन्तव्य हुने विश्वास गरिएको छ ।

सञ्चारमाध्यमका अनुसार रियलले भारानलाई ६० मिलियन युरोको आसपासमा विक्री गर्न चाहेको छ । रियलले पनि केलियन एमबाप्पे वा इर्लिङ हालान्ड मध्ये एकलाई भित्राउनका लागि ठूलो रकम खर्चनु पर्ने हुन सक्छ । त्यसका लागि भारानलाई विक्री गर्दा केहि सहयोग हुने विश्वास गरिएको छ । भारानको ट्रान्सफरमा पोग्बालाई संलग्न गर्नेबारे पनि रियलले सोचेको छ ।

डेभिड अलाबाको आगमन, इडर मिलिटियो, नाचो फर्नान्डेज र जिसस भालेजो टोलीमा रहेका कारण भारान वा रामोसले क्लब छाड्ने रियलको अनुमान थियो । पेरिस सेन्ट जर्मेनले पनि भारानलाई भित्राउन चाहेको भएपनि उनको चाहना भने इंग्ल्यान्ड नै रहेको बताइएको छ ।