एजेन्सी – क्याटलान क्लब बार्सिलोनाका डिफेन्डर इंग्लिस प्रिमियर लिग क्लब लिड्स युनाइटेडमा अनुबन्धित भएका छन् । लिड्सले २४ वर्षीय स्पेनिस लेफ्टब्याक फिर्पाेलाई १३ मिलियन पाउन्डमा चार वर्षको लागि क्लबमा अनुबन्ध गर्न सफल भएको हो ।

अब फिर्पाे सन् २०२५ सम्म एलान्ड रोडको टोलीमा रहनेछन् । प्रतिभावान डिफेन्डरको रुपमा हेरिएको फिर्पाेले अब लिड्समा इजिजिजन एलिओस्कीको स्थान लिनेछन् । फिर्पाेले दुई सिजन बार्सिलोनामा बिताएका थिए । नोउक्याम्पमा उनले ४१ खेलमा मात्रै मौका पाएका थिए ।
लिड्सले आफ्नो आधिकारिक धारणा सार्वजनिक गर्दै फिर्पाेलाई धेरै क्लबले नजर लगाएपनि आफ्नो क्लबमा भित्र्याउन सफल भएको बताएका छन् । अब फिर्पाेले कोरोना प्रोटोकल पुरा गर्दै लिड्समा मेडिकल गर्नेछन् ।

डोनिनिकन रिपब्लिकमा जन्मिएका फिर्पाे युवा अवस्थामै स्पेनको रियल बेटिसमा आबद्ध हुन पुगेका थिए । उनले रियल बेटिसबाटै २०१८–१९ को सिजनमा ला लिगामा डेब्यु गरेका थिए । उनेल बेटिसमा पहिलो सिजन २९ खेल खेल्दै ५ असिस्ट र ३ गोल गरेका थिए । उनी स्पेनको यु–२१ टोलीमा रहँदा टोलीले युइएफए युरोपियन यु–२१ को उपाधि जित्दा उनी टोलीका सदस्य थिए । त्यसपछि उनी २०१९–२० को सिजनमा बार्सिलोना पुगेका थिए ।

उनलाई बार्सिलोनाले ५ वर्षको सम्झौता गरेका थिए । उनले बार्सिलोनाबाट दुई सिजनमा ४१ खेल खेल्दै दुई गोल गरेका थिए । उनले बार्सिलोनाबाट कोपा डेल रेको उपाधि जित्न सफल भएका थिए । उनी यो समरमा लिड्समा अनुबन्ध हुने तेस्रो खेलाडी हुन् ।

क्याटलान क्लब बार्सिलोनाले यो सिजन आर्थिक मन्दीका कारण खेलाडीको पारिश्रमिक कटौती गर्दै महँगा खेलाडी बिक्री गर्ने योजना बनाएको छ । बार्सिलोनाले यो सिजन कम मुल्यमा मेम्फिस डिपाए, सर्जियो अगुएरो र एरिक गार्सियालाई अनुबन्ध गरिसकेको छ । बार्सिलोनाले आफ्नो कप्तान लियोनेल मेस्सीलाई क्लबमै राख्नको लाथि रकम जुटाइरहेको छ ।