एजेन्सी – कोपा अमेरिका २०२१ को फाइनलमा शनिबार अर्जेन्टिना र ब्राजिल खेल्दैछन् । खेलको दुई दिनअघि ब्राजिलका स्टार फरवार्ड नेयमारले सामाजिक संजालमार्फत आफ्नै टोलीका समर्थकसँग रिस पोखेका छन् ।

ब्राजिलले उपाधिका लागि फाइनलमा लिओनेल मेस्सीको कप्तानीमा रहेको अर्जेन्टिनाको सामना गर्दैछ । तर ब्राजिलकै केहि समर्थकले भने मेस्सीले उपाधि जितेको हेर्न चाहेको भन्दै सामाजिक संजालमा लेखिरहेका छन् । मेस्सी विश्व फुटबलकै उत्कृष्ट खेलाडी रहेकाले अन्तर्राष्ट्रिय उपाधि जितुन् भन्ने धेरैको चाहना रहेको छ । नेयमार भने ब्राजिलका समर्थकले यस्तो सोच्न नहुने विचार राख्छन् ।

उनले सामाजिक संजाल इन्स्टाग्राममा लेखेका छन्, ‘म एक ब्राजिलियन हुँ । गौरव र प्रेमले भरिपूर्ण ब्राजिलियन । मेरो सपना सधैं राष्ट्रिय टोलीको साथमा रहेर समर्थकमाझ रहनु हो ।’

‘मैले कहिले पनि ब्राजिलको विरुद्धमा बोलेको छैन । चाहे त्यो खेल होस, फेसन सो होस् या ओस्कार नै किन नहोस् । यदि त्यहाँ ब्राजिल छ भने म पनि ब्राजिल हुँ । ब्राजिलियन भएर अन्य सोच राख्न कसले सक्ला ?’

‘सबैको आ-आफ्नो सोच हुन्छ । म त्यसको सम्मान गर्छु । तर जो हाम्रो विपक्षमा छ मलाई उनीहरुको केहि वास्ता छैन ।’

सामाजिक संजालमा निकै चर्चामा रहने नेयमारको यो पोस्टले ब्राजिलका समर्थक पनि रुष्ट बनेका छन् । क्लब फुटबलमा चर्चामा आएपनि नेयमार ब्राजिलमा भने त्यति लोकप्रिय छैन । उनलाई ब्राजिलको फुटबल खेल्ने शैली विश्वमाझ खराब चिनारी दिएको आरोप समेत लाग्ने गरेको छ ।

यो पनि : अर्जेन्टिनाको जर्सीमा मेस्सीको पाँचौ फाइनल