एजेन्सी – इन्ज्युरी समयमा सम्हालिन नसक्दा इंग्ल्यान्ड फिफा विश्वकप कतार २०२२ को युरोपियन छनोटमा पोल्यान्डसँग बराबरीमा रोकिएको छ । घरेलु मैदानमा इन्ज्युरी समयमा डामिएन सिमान्स्कीले गोल गर्दै पोल्यान्डलाई इंग्ल्यान्डसँगको हारबाट जोगाए ।

खेल १–१ गोलको बराबरीमा टुंगिएको थियो । बल पोसेसनमा घरेलु टोलीलाई दवावमा राखेको इंग्ल्यान्डले गोलको लागि निकै संघर्ष गर्नुपर्दा दोस्रो हाफ नै कुर्नुपरेको थियो । ७२औं मिनेटमा कप्तान ह्यारी केनले गोल गर्दै इंग्ल्यान्डलाई १–० को अग्रता दिलाएका थिए । उनले केल वाल्करको पासमा गोल गरेका थिए ।

जिततर्फ उन्मुख इंग्ल्यान्ड इन्ज्युरी समयमा सम्हािलन नसक्दा बराबरीमा रोकिन बाध्य बन्यो । इन्ज्युरी समयको थप गरिएको दोस्रो मिनेटमा कप्तान रोबर्ट लेवान्डोस्कीको पासमा डामिएन सिमान्स्कीले गोल गर्दै इंग्ल्यान्डलाई जितबाट वञ्चित गराए ।

छनोटमा इंग्ल्यान्डको यो पहिलो बराबरीको नतिजा हो । पोल्यान्डको यो दोस्रो बराबरीको नतिजा हो । यो बराबरीपछि पनि इंग्ल्यान्ड ६ खेलबाट ५ जित र १ बराबरीसँग १६ अंक जोडेर शीर्षस्थानमा यथावत रहेको छ । पोल्यान्ड ११ अंक जोडेर तेस्रो स्थानमा झरेको छ ।

यही समूहको अर्काे खेलमा अल्वानियाले सान मारिनोमाथि ५–० को फराकिलो जित दर्ता गर्दा हंगुेरीले एन्डोरालाई २–१ ले पराजित गरेको छ । यो नतिजापछि अल्वानिया १२ अंक जोडेर दोस्रो स्थानमा उक्लिएको छ । सान मारिनोले अंकको खाता खोल्न सकेको छैन । हंगेरीको १० तथा एन्डोराको ३ अंक छ ।