एजेन्सी – सुपर स्टार लिओनल मेस्सीको पेरिस सेन्ट जर्मेन (पिएसजी) को नयाँ यात्रा सोचे जस्तै सुखद हुन सकेन । बार्सिलोना छाडेर सिजनको सुरुवातमा उनी पिएसजी पुगेका थिए । गत साता लिग वानमा पहिलो हार बेहोर्ने क्रममा रेन्ससँग पिएसजी २–० ले पराजित भएको थियो ।

त्यसअघि च्याम्पियन्स लिगमा म्यानचेस्टर सिटीमाथि पिएसजीले २–० को जित निकालेको थियो । त्यो जितमा मेस्सीले दोस्रो गोल गरेका थिए । पिएसजीका लागि मेस्सीको त्यो नै पहिलो गोल थियो । सोचे जस्तो सुरुवात नभएपछि अर्जेन्टिनी सुपरस्टारले पिएसजीमा आबद्ध भएकोमा कुनै पछुतो नभएको बताएका छन् ।

पिएसजी पुगेयता पहिलो पटक अन्तवार्ता लिएका मेस्सीले आफूले पिएसजी जाने गरेको निर्णय सहि भएको बताएका छन् । ‘मैले पिएसजीमा आएर गल्ती गरेको छैन,’ उनले भनेका छन्,’ मलाई यहाँ सहज बनाउने धेरै खेलाडी छन् । नेयमार, पारेडेस, डी मारियासँग मेरो राम्रो सम्बन्ध छ । उनीहरुले मलाई निकै सहयोग गरे ।’

मेस्सीले पेरिस सहर नयाँ भएकाले परिवारलाई भने केहि कठिनाई भएको स्वीकारे । ‘म यहाँ केहि हराएको जस्तो भने भएको छु । सहर नयाँ भएकाले केही समय लाग्छ । बार्सिलोना सहर मलाई राम्रोसँग थाहा थियो । त्यहाँको बानी छुट्न गाह्रो हुने रहेछ,’ उनले भने ।

मेस्सीले बार्सिलोना छाडेयता भने क्लब दबाबमा रहेको छ । टोलीले ला लिगा वा च्याम्पियनन्स लिगमा सोचे जस्तो प्रदर्शन गर्न सकेको छैन । जसका कारण प्रशिक्षक रोनाल्ड कोम्यान पनि दबाबमा रहेका छन् । अर्को तर्फ मेस्सीले पिएसजीमा आफूलाई पूर्ण रुपमा भिजाउन पर्नेछ । क्याम्प नोउमा भन्दा पेरिसमा फरक वातावरण छ नै ।

‘मेस्सी सबै लुकाउन सक्छन् । उनी एकदमै राम्रो खेलाडी हुन् र हाम्रा लागि सबै जितेका छन्,’ कोम्यानले मेस्सीका बारेमा भनेका थिए, ‘उनी उत्कृष्ट खेलाडीबाट घेरिएका थिए । तर उनले फरक गर्न सक्छ । उनलाई धेरै धन्यवाद । यो आलोचना होइन, मेरो दृष्टिकोण हो ।’ पिएसजी पुगेयता ५ खेल खेलेका मेस्सीले अहिले सम्म १ गोल गरेका छन् ।