एजेन्सी – फिफा विश्वकप कतार २०२२ को युरोपेली छनोटमा डेनमार्कले लगातार सातौ जित दर्ता गरेको छ । डेनमार्कले घरेलु टोली मोल्दोभालाई ४–० को फराकिलो अन्तरले पराजित गरेको हो ।

सबै चार गोल पहिलो हाफमा नै भएको थियो । डेनमार्कको जितमा एन्ड्रिएस स्कोभ ओल्सेन, सिमोन कायर, क्रिस्टियन नोरग्राड र जाकिमले गोल गरे । मोल्दोभामा शनिबार राति भएको खेलको २३औं मिनेटमा एन्ड्रिएस स्कोभ ओल्सेनको गोलबाट डेनमार्कले अग्रता लिएको थियो ।

३४औं मिनेटमा कप्तान सिमोन कायरले पेनाल्टीमा गोल गर्दै डेनमार्कको अग्रता दोब्बर पारे । ३९औं मिनेटमा क्रिस्टियन नोरग्राडले ओल्सेनको पासमा गोल गर्दै डेनमार्कलाई ३–० ले अघि बढाए । ४४औं मिनेटमा जोआकिमले युसुफ पउल्सेनको पासमा गोल गरेपछि डेनमार्कले पहिलो हाफमा ४–० को आरामदायी अग्रता कायम ग¥यो ।

दोस्रो हाफमा पनि डेनमार्कले घरेलु टोलीलाई दवावमा राखेपनि थप गोल गर्न नसक्दा पहिलो हाफको चार गोल नै डेनमार्कको जितमा पर्याप्त बन्यो । लगातार सातौ जितसँगै डेनमार्कले विश्वकपमा छनोट हुने सम्भावना बलियो बनाएको छ ।

समूह ‘एफ’ मा शीर्षस्थानमा रहेको डेनमार्कको ७ खेलबाट २१ अंक पुगेको छ । डेनमार्कले दोस्रो स्थानमा रहेको स्कटल्यान्डलाई ७ अंकले नै पछि पारेको छ । पराजित मोल्दोभा १ अंक जोडेर पुछारमा रहेको छ ।

यही समूह ‘एफ’ को अर्काे खेलमा अष्ट्रियाले फारोइ आइल्यान्डलाई २–० ले पराजित गरेको छ । अष्ट्रियाको जितमा कोनराड लेइमेर र मार्सेल सवित्जरले गोल गरे । जितपछि अष्ट्रिया ७ खेलबाट १० अंक जोडेर चौथो स्थानमा यथावत रहेको छ । फारोइ आइल्यान्ड ४ अंक जोडेर पाँचौ स्थानमा रहेको छ ।

अर्काे खेलमा स्कटल्यान्डले इजरायललाई ३–२ ले पराजित गरेको छ । जितपछि स्कटल्यान्ड ७ खेलबाट १४ अंक जोडेर दोस्रो स्थानमा रहँदा इजरायल १० अंक जोडर तेस्रो स्थानमा यथावत रहेको छ ।