एजेन्सी – मोइस किनले गोल गरेपछि युभेन्टसले आइतबार सिरि एमा जोसे माउरिन्होको एएस रोमालाई पराजित गरेको छ । सिरि एमा जारी सिजनमा युभेन्ट्सको यो लगातार चौथो जित हो ।

एभर्टनबाट लोनमा युभेन्ट्स पुगेका किनले १६ औं मिनेटमा हेडमार्फत गोल गरेका थिए । त्यसका लागि रोड्रिगो बेन्टाकुरको भूमिका महत्वपूर्ण थियो । रोमाले खेलमा बराबरीको अवसर पाएको थियो । तर सफल हुन सकेन । पहिलो हाफका लागि एक मिनेट बाँकी रहँदा जोर्डन भेरेटोटको पेनाल्टी प्रहारलाई युभेन्ट्सका गोलकिपरले रोक्दै टोलीको संकट टारेका थिए ।

टमी अब्राहमलाई युभेन्ट्सका खेलाडीले फाउल गरेपछि रोमाले पेनाल्टी पाएको थियो । फाउल भएपनि अब्राहमको प्रहारमा बल गोलमा परिणत भएको थियो । तर रेफ्रीले त्यसअघि नै पेनाल्टीको इशारा गरिसकेका थिए । तर, टोली पेनाल्टीको फाइदा उठाउन असफल भयो । इंग्ल्यान्डका फरवार्डले आफै पेनाल्टी हान्नका लागि बल लिएपछि पछि भेरेटोटले प्रहार गरे । त्यसमा गोलकिपर बाधक रहे ।

रोमाले जारी सिजनमा तेस्रो हार बेहोरेको छ । जसका कारण टोली शीर्षस्थानको नेपोली भन्दा ९ अंकले पछाडि परिसकेको छ । नेपोलीले खेलमा सतप्रतिशत नतिजा निकाल्दै २४ अंक जोडेको छ । कमजोर ढंगले सिजनको सुरुवात गरेको युभेन्ट्स (१४ अंक) सातौं स्थानमा उक्लेको छ ।