एजेन्सी – स्पेनिस क्लब रियल म्याड्रिडले युइएफए च्याम्पियन्स लिगमा सानदार जित दर्ता गरेको छ । रियलले युक्रेनी क्लब साख्तर डोनेक्समाथि उसकै मैदानमा ५–० को प्रभावशाली जित निकालेको हो ।

रियलको सानदार जितमा ब्राजिली युवा विंगर भिनिसियस जुनियरले दुई तथा रोड्रिगो र कप्तान करिम बेन्जेमाले समान एक गोल गर्दा एक गोल उपहार पाएको थियो ।

एनएसके ओलम्पिक स्टेडियममा मंगलबार राति भएको खेलमा पाहुना टोली रियलले पहिलो हाफमा आत्मघाती गोलबाट अग्रता लिएको थियो । लुकास भास्क्वेजको थ्रु बलमा करिम बेन्जेमाले प्रयास गर्दा क्रिभस्टभले आफ्नै पोस्टमा गोल गर्न पुग्दा रियलले पहिलो हाफमा १–० को अग्रता लिन सफल भयो ।

दोस्रो हाफमा १५ मिनेटको अन्तरमा तीन गोल गर्दै रियल फराकिलो जिततर्फ अग्रसर बन्यो । ५१औं मिनेटमा ब्राजिली युवा विंगर भिनिसियसको गोलमा रियलले खेलमा अग्रता दोब्बर बनायो । उनले लुका मोड्रिचको पासमा गोल गरेका थिए ।

५६औं मिनेटमा भिनिले व्यक्तिगत दोस्रो तथा टोलीका लागि तेस्रो गोल गरे । ६५औं मिनेटमा दुई गोल गरिसकेका भिनिको पासमा अर्का ब्राजिली विंगर फरवार्ड रोड्रिगोको गोल गर्दै रियललाई फराकिलो जिततर्फ अघि बढाए । इन्ज्युरी समयको थप गरिएको पहिलो मिनेटमा कप्तान करिम बेन्जेमाले मार्काे एसेन्सियाको पासमा गोल गर्दै रियललाई ५–० को सानदार जित दिलाए ।

यो जितसँगै रियल ३ खेलबाट ६ अंक जोडेर दोस्रो स्थानमा यथावत रहेको छ । समान ६ अंक नै रहेपनि रियल हेड टु हेडमा एफसी सेरिफ भन्दा पछि छ । रियलले घरेलु मैदानमा सेरिफसँग २–१ को हार बेहोरेको थियो । पराजित साख्तर १ अंक जोडेर पुछारमा छ ।

यही समूह ‘डी’ को अर्काे खेलमा इटालियन क्लब इन्टर मिलानले मोल्दोभाको एफसी सेरिफमाथि ३–१ को सहज जित निकालेको छ । इन्टरको जितमा इडेन जेको, आर्टुरो भिडाल र स्टेफन डि भिरिजले गोल गरे । सेरिफका सेवास्टिन थिलले एक गोल फर्काए ।

यो नजितासँगै सेरिफ दतीन खेलबाट ६ अंक जोडेर शीर्षस्थानमा यथावत छ । सेरिफलाई हराएको इन्टर ४ अंक जोडेर तेस्रोमा रहेको छ ।