काठमाडौं (हाम्रो खेलकुद) – कन्काई नगरपालिका र ललितपुर महानगरपालिकाले उपमेयर कप राष्ट्रिय महिला लिग २०७८ को छनोट चरण अन्तर्गत सोमबार नकआउट चरणमा स्थान पक्का गरेका छन् ।

समूहको अन्तिम खेलमा दुवै टोलीले बराबरी खेल्दै आफू अनुकुल नतिजासहित नकआउट चरणमा प्रवेश गरेका हुन् । कन्काईले बागमती नगरपालिका, सर्लाहीलाई १-१ को बराबरीमा रोक्दै समूह विजेता बन्न सफल भयो । खेलको २१ औं मिनेटमा कुसुम खतिवडाले गोल गर्दै कन्काईलाई अग्रता दिलाएकी थिइन् । इमा राईको क्रसलाई गोलरक्षक सपना राईले फुस्काएपछि आएको बललाई कुसुमले गोललाइन नजिकबाट गोल गरेकी थिइन् ।

दोस्रो हाफमा बागमतीले गोल गर्ने प्रयास गरेपनि सफल हुन सकेन । ८६ औं मिनेटमा सदीपा भोलोनले गोल गर्दै खेलमा फर्काउने प्रयास गरिन् । काउन्टर अट्याकमा गोलरक्षक अघि बढेपछि उनले झन्डै ३० यार्ड टाढाबाट गोल गरेकी थिइन् । तर थप गोल गर्न नसक्दा खेल १-१ को बराबरीमा सकियो ।

समान ७-७ अंक बोकेपनि गोलअन्तरको आधारमा कन्काई अघि बढेको हो । कन्काईले यसअघि गोदावरीलाई १२-० तथा महालक्ष्मी नगरपालिकालाई १९-० ले पराजित गरेको थियो । बागमतीले महालक्ष्मीलाई ९-० तथा गोदावरीलाई ७-० ली हराएको थियो । गोदावरीले सोमबार नै भएको पहिलो खेलमा महालक्ष्मीलाई ५-३ ले हराउँदै सान्त्वना जित दर्ता गर्यो ।

त्यस्तै दिनको अन्तिम खेलमा कालिका नगरपालिकालाई १-१ को बराबरीमा रोक्दै ललितपुर महानगरपालिका पनि नकआउट चरणमा प्रवेश गर्यो । ललितपुरले खेलको पहिलो हाफमा रजनी थोकरको गोलमा अग्रता लिएको थियो । कालिकाकी गोलरक्षक एन्जिला तुम्बापो सुब्बाले दोहोरो बचाउ गरेपछि तेस्रो प्रयासमा रजनीले गोल गरेकी थिइन् ।

दोस्रो हाफमा कालिकाका लागि निशा थोकरले गोल फर्काइन् । उनले ६१ औं मिनेटमा सविता रानामगरको कर्नरमा हेडरमार्फत गोल गरेकी थिइन् । दुवै टोलीले त्यसपछि आक्रमण बुनेपनि गोल हुन नसक्दा ललितपुरले नकआउट चरणको यात्रा तय गर्यो ।

ललितपुरले समूहको पहिलो खेलमा कागेश्वरी मनोहरा नगरपालिकालाई १०-० ले पराजित गरेको थियो । त्यस्तै कालिकाले पनि कगेश्वरीलाई १०-० ले नै पराजित गरेको थियो । तर कालिकाले उक्त खेलमा नियममा विभागका ४ खेलाडी खलाउन पाउने उल्लेख भएपनि त्यसविपरित ५ खेलाडी खेलाएपछि नतिजा कागेश्वरीको पक्षमा ३-० को जित दिइएको थियो । ललितपुरले २ खेलमा ४ अंक जोड्दा कागेश्वरी ३ अंकसहित दोस्रो र कालिका १ अंकसहित पुछारमा रहयो ।

प्रतियोगितामा कुल ३१ टोलीलाई १० समूहमा विभाजन गरिएको छ । हरेक समूहको शीर्ष टोली नकआउट चरणमा प्रवेश गर्नेछ । प्रतियोगिताको विजेता र उपविजेता टोली राष्ट्रिय लिगमा छनोट हुनेछन् ।

यस्तै प्रतियोगिताको विजेताले ५ लाख नगद पुरस्कार पाउनेछन् । यस्तै उपविजेताले ३ लाख र फेयर प्ले टिमले ५० हजार तथा प्रतियोगिताको सर्वोकृष्ट खेलाडीले ५० हजार र विधागततर्फ उत्कृष्ट हुनेले समान २०-२० हजार प्राप्त गर्नेछन् ।