काठमाडौं (हाम्रो खेलकुद) – नेपाली यू-२३ राष्ट्रिय फुटबल टोली एएफसी यू-२३ एसियन कप छनोट अन्तर्गत समूह बी मा लगातार तेस्री हार बेहोर्दै प्रतियोगिताबाट बाहिरिएको छ । आइतबार भएको समूहको अन्तिम खेलमा नेपाल लेबनानसँग ४-० ले पराजित भयो ।

पहिलो हाफमा १-० ले पछि परेको नेपालले दोस्रो हाफमा ३ गोल खाएको थियो । खेल अवधिभर नै लेबनानले नेपालमाथि दबाब राखेको थियो । पुन: एकपटक एसियन यू-२३ छनोटमा नेपालले गोल गर्न सकेन । लेबनानविरुद्ध २६ औं मिनेटमा पहिलो गोल खाएको टोलीले दोस्रो हाफको दोस्रो मिनेटमा नै दोस्रो गोल खायो । त्यसपछि लेबनानले ७४ औं र ८२ औं मिनेटमा गोल गर्दै फराकिलो जित पक्का गर्यो ।

अघिल्लो दुवै प्रतियोगितामा गोलविहिन नेपालले यसपटक पनि विपक्षीलाई दबाब दिन सकेन । वर्तमान राष्ट्रिय टोलीका ६ खेलाडी तथा सिनियर टोलीको अनुभव बोकेका अन्य ५ खेलाडी भएपनि टोलीको आक्रमण फितलो सावित भयो । रक्षात्मक रुपमा पनि प्रशिक्षक बालगोपाल महर्जनले मिडफिल्डरलाई डिफेन्समा उतारेका थिए ।

पहिलो खेलमा इरानसँग ४-० ले पराजित नेपाली टोलीले दोस्रो खेलमा ताजिकिस्तानसँग ६-० को हार बेहोरेको थियो । समूह अन्तर्गत विहीबारको अर्को खेलमा इरानले लेबनानलाई २-० ले पराजित गरेको थियो । पहिलो खेलमा ताजिकिस्तानसँग १-० ले पराजित लेबनानको पनि छनोट हुने सम्भावना यसअघि नै सकिएको थियो । इरान र ताजिकिस्तानको ६-६ अंक हुँदा लेबनान ३ अंकसाथ छनोट अन्त्य गर्यो । नेपालले भने अंकको खाता खोल्न सकेन । आज अर्को खेलमा इरान र ताजिकिस्तानबीच समूह विजेता बन्नका लागि प्रतिस्पर्धा हुनेछ ।

समूहको शीर्ष टोली सिधै अन्तिम चरणमा छनोट हुँदा दोस्रो स्थान हासिल गर्ने उत्कृष्ट चार टोली पनि अघि बढ्नेछन् । नेपालले हालसम्म एएफसीको यू–२३ एसियन कप प्रतियोगिताको छनोट चरण पार गर्न सकेको छैन । पछिल्लो दुई संस्करणमा नेपाली टोली जितविहिन हुँदै छनोटबाट घर फर्केको थियो । दुवै संस्करणमा नेपालले गोल गर्न सकेको थिएन ।

प्रतियोगिताको पाँचौ संस्करणमा आइपुग्दा इराक, जापान, उज्बेकिस्तान र दक्षिण कोरियाले १–१ पटक उपाधि जितेका छन् । साविक विजेता दक्षिण कोरिया सन् २०१६ मा उपविजेता समेत रहेको थियो । गत संस्करणमा पराजित साउदी अरेबिया भने २०१३ मा भएको पहिलो संस्करणमा पनि फाइनलमा हारेको थियो ।