एजेन्सी – इटालियन प्रशिक्षक एन्टोनियो कोन्टे प्रिमियर लिग फर्केका छन् । टोटेनहमले उनलाई टोलीको नयाँ मुख्य प्रशिक्षक नियुक्त गरेसँगै उनी प्रिमियर लिग फर्कने पक्का भएको हो । नुनो इस्प्रिटो सान्टोलाई बर्खास्त गरेको भोली पल्ट मंगलबार टोटेनहमले चेल्सीका पूर्व प्रशिक्षक समेत रहेका कोन्टेलाई नयाँ प्रशिक्षक नियुक्त गरेको हो ।

५२ वर्षे प्रशिक्षकले यसअघि इन्टर मिलानको नेतृत्व गरेका थिए । सम्झौता थप्ने विकल्पसहित कोन्टेले टोटेनहमसँग २ वर्षको सम्झौता गरेका छन् । ‘प्रिमियर लिग क्लबको प्रशिक्षकका रुपमा फर्कन पाउँदा म एकदम खुसी छु । क्लबसँग विश्वको उत्कृष्ट मध्येको रंगशाला छ,’ उनले भनेका छन्, म टोलीसँग काम गर्नका लागि प्रतीक्षा गर्न सक्दिन ।’

कोन्टेले चेल्सीलाई दुई वर्ष प्रशिक्षण दिएका थिए । उनले आफ्नो पहिलो वर्ष २०१६/१७ मा चेल्सीलाई प्रिमियर लिग उपाधि दिलाएका थिए । त्यस्तै उनले २०१८ मा एफए कप जितेका थिए । प्रिमियर लिगको प्रशिक्षकका रुपमा उनले ७६ खेल खेलाउँदै ५१ खेल जितेका थिए । उनी तीन पटक मेनेजर अफ मन्थ चुनिएका थिए ।

गत सिजन उनले मिलानलाई सिरि ‘ए’ जिताएका थिए । प्रशिक्षकका रुपमा त्यो उनको चौथो सिरि ‘ए’ उपाधि थियो । त्यसअघि उनले २०११ देखि २०१४ सम्म लगातार तीन पटक युभेन्ट्सलाई सिरिए जिताएका थिए । उनले आफ्नो खेल जीवनको अधिकांश समय युभेन्ट्समै बिताएका थिए । इटालीबाट उनले २० खेल समेत खेलेका थिए । उनको प्रशिक्षणमा टोटेनहमले आइतबार एभर्टनको सामना गर्नेछ ।