काठमाण्डौं (हाम्रो खेलकुद) – तेश्रो दक्षिण एसियाली फुटसल च्याम्पियनसिपमा नेपाल दोस्रो भएको छ । बराबरी गरे उपाधि जित्ने खेलमा सोमबार नेपाल आयोजक श्रीलंकासँग २–१ ले पराजित भएपछि दोस्रो स्थानमा सिमित भएको हो ।
नेपालले सातौं मिनेटमा सुभाष घलानको गोलबाट लिएको अग्रतालाई जोगाउन नसक्दा नतिजा सुम्पेको थियो । खेलको अन्त्यतिर नेपालले सम्हालिन सकेन । खेलको अत्यतिर ४ मिनेटको फरकमा नादानले दुई गोल गर्दै श्रीलंकालाई जित दिलाएको राष्ट्रिय खेलकुद परिषद् (राखेप) ले प्रेस विज्ञप्तीमार्फत जनाएको छ ।
‘थोरै समय सम्हालिन नसक्दा जित बाट बञ्चित भयौं’ – कप्तान साजन महर्जनले भने । उनले छोटो समयको तयारीमा पनि फाइनल सम्मको यात्रा तय गर्न सकेका भने खुसी ब्यक्त गर्दै टोलीका सम्पूर्ण खेलाडीहरुको मेहनतले सफल भएको बताए । उनले आगामी दिनमा राज्यले यस खेललाई सहयोग पु¥याउने हो भने नेपाल दक्षिण एशियामा उत्कृष्ट टोली बन्ने विश्वास व्यक्त गरे ।
राखेपमा दर्ता नेपाल फुटसल संघका अध्यक्ष देवकुमार अधिकारीले फुटसल विकासका लागि अझै प्रयास गर्ने बताए । राउन्ड रोविनको अन्तिम खेलअघि नेपालले भारतलाई ५–० ,मालदिभ्सलाई ३–२ र पाकिस्तानलाई ९–० ले हराएको थियो । प्रतियोगितामा दक्षिण एसियाका ५ राष्ट्रको सहभागिता थियो ।
