काठमाडौं (हाम्रो खेलकुद) – रेडबुल फुटसल लिगअन्तर्गत समूह एको शीर्ष टोली किक अफ फुटसल बराबरीमा रोकिएको छ भने अर्को खेलमा सामाखुसी फुटसल विजयी भएको छ । किक अफ अवे खेलमा ढुकु फुटसल हबसँग ३–३ गोलको बराबरीमा रोकिएको थियो । ढुकुका लागि सुरज रावत,अन्सु कार्की र छबिलाल रोक्काले गोल गरे । किकअफ लागि प्रवेश जोशीले दुई र अर्को गोल रजिन पाण्डेले गरे । ढुकुका गोलकिपर सुमित आले म्यान अफ दि म्याच घोषित भए । 

बराबरीपछि पनि किक अफ २८ अंकसहित शीर्षस्थानमा यथावत छ । समान २८ अंक भएपनि गोलअन्तरमा बानेश्वर दोस्रो र २३ अंकका साथ ढुकु तेस्रो स्थानमा छ ।
अर्को खेलमा सामाखुसीले होम टिम किर्तीपुर फुटसललाई १०–३ को फराकिलो अन्तरले हरायो । सामाखुसीका लागि नवीन लामा र सन्तोष तामाङले ह्याट्रिक गरे भने सरोज घिमिरे,देवचन्द थापा मगर,सुजन महर्जन र श्याम नेपालीले एक एक गोल गरे । कीर्तिपुरका लागि अमन महर्जन,प्रताप महर्जन र एपेक्स महर्जनले गोल गरे । सामाखुसीका नवीन म्यान अफ दी म्याच बने ।
जितपछि सामाखुसी २२ अंकका साथ तेस्रो स्थानमा उक्लिएको छ । समान २२ अंक जोडेपनि ताहचल भने चौथो स्थानमा छ । २८ अंकका साथ शंखमुल समूह बीको शीर्षस्थानमा छ भने २६ जाडेको कुमारी दोस्रो स्थानमा छ । कीर्तिपुर १० अंकसहित छैटौं स्थानमा छ ।