काठमाडौं ( हाम्रो खेलकुद)– रेडबुल फुटसल लिगअन्तर्गत सेमिफाइनलको पहिलो खेलमा सामाखुसी र शंखमुल फुटसल विजयी भएका छन् । सामाखुसीले किक अफ फुटसललाई ४–२ ले हरायो । त्यस्तै शंखमुलले ताहचल फुटसललाई ९–१ ले पराजित गर्यो ।
सामाखुसीमा कप्तान नविन लामा र श्याम नेपालीले समान २ गोल गरे । किकअफका कृष्ण मल्ल र राज पौडेलले गोल गरे । सामाखुसीका नविन म्यान अफ दि म्याच घोषि भए । दोस्रो लेगको खेल बिहीबार खेल्ने छन् ।
तहाचलविरुद्धको फराकिलो जितमा शंखमुका कप्तान संजोग चाम्लिङ राईले ह्याट्रिक गरे । त्यस्तै अभय राणाले २, दिनेश राजवंशी र निर्मल गुरुङले समान १ गोल गरे । २ गोल आत्मघाती भएको थियो । ताहाचलका एकमात्र गोल सुजित बुढाथोकीले गरे । संजोग म्यान अफ दि म्याच घोषित भए । यी दुई बीचको दोस्रो लेग ताहाचलमा शुक्रबार हुनेछ ।
एएमए इभेन्ट दरबारमार्गको आयोजनामा होम एन्ड अवेको आधारमा असोज १० गतेदेखि सञ्चालन भइरहेको लिगमा राजाधानीका १६ फुटसल टोलीको सहभागिता छ । लिगको सर्वाधिक पुरस्कार राशी रहेको प्रतियोगिताको विजेताले १० लाख र उपविजेता टोलीले ५ लाख रुपैयाँ पाउनेछन् ।
रेडबुल मुख्य प्रायोजक रहेको प्रतियोगिताको उत्कृष्ट खेलाडी र उत्कृष्ट गोलकिपरले समान ५० हजार रुपैयाँ पाउनेछन् । प्रतियोगितालाई फग बडी स्प्रे र जेइटिई मोबाइलले सह प्रायोजन गरेका छन् ।
