काठमाडौँ (हाम्रो खेलकुद) – साविक विजेता लियोपार्ड फिजियोले नेप्टा फुटसल प्रतियोगितामा आफ्नो लक्ष्य उपाधि जित्ने बताएको छ । फिजियोथेरापिस्टहरुको छाता संगठन नेपाल फिजियोथेरापी संघ (नेप्टा) को आयोजनामा हुने प्रतियोगितामा रियोपार्डले उपाधि रक्षा गर्ने लक्ष्य भएको जनाएके छ ।

फिजियोथेरापिस्टहरुलाई व्यायाम, मानसिक रुपमा फुर्ती साथै फिजियोहरूलाई एकै ठाउँ भेटघाट गराउन विश्व फिजियोथेरापी दिवसको अवसरमा नेप्टाले हरेक वर्ष एक दिने प्रतियोगिता आयोजन गर्दै आएको छ ।

विश्वभर सेप्टेम्बर ८ तारिखलाई विश्व फिजियोथेरापी दिवसको रुपमा मनाउँदै आइरहेको छ । ढुकु फुटसल हवमा शनिबार हुने प्रतियोगितामा ७ टोलीको सहभागीता रहनेछ । प्रतियोगिताको विजेताले ३० हजार, र दोस्रो हुनेले २० हजार रुपैयाँ पाउनेछन् ।

प्रतियोगिताको उपाधि रक्षा गर्न आफूहरू तयार रहेको लियोपार्डका टिम व्यवस्थापक तथा अर्थोप्लास्ट रिह्याव सेन्टरका कार्यकारी निर्देशक समिद कतिला श्रेष्ठले बताए । निकेश डाँगीको कप्तानीमा रहेको टोलीलाई २४ संस्थाले प्रायोजन गरेको छ । प्रतियोगिताको लागि अनुमानित पाँच लाख खर्च हुनेछ । प्रायोजकबाट ३ लाख प्राप्त हुने अनुमान गरिएको छ ।

लियोपार्ड फिजियोले गत संस्करणको उपाधि जित्दाका उत्कृष्ट गोलरक्षक आविष्कार पुडासैनी भने यस सिजनमा हुने छैनन् । नेपाल राष्ट्रिय फुटबल टोलीका फिजियो पुडासैनी हाल राष्ट्रिय टोली सँग म्यान्मारमा छन् ।

टोलीमा रविन्द्र बस्नेत, उज्ज्वल डोटेल, युवराज शर्मा, अभिषेक रोकाया, निकेश डाँगी, लाक्पा शेर्पा, सृजन तिम्सिना र अनिष बुढाथोकी छन् । टोलीका हरेक खेलाडीले २० हजार पाउने व्यवस्थापक श्रेष्ठले जनाएका छन् ।

यस संस्करण एन्टागोनिस्ट एफसी, लियोपार्ड फिजियो, एफसी रिभाईभ, एफएनपी च्याप्टर, एसीबीती सक्षम एफसी, फास्ट ट्वीच, र एनएसीयाएचस फिजियोको सहभागिता रहने छ । टोलीले प्रतियोगिता जिते पुरस्कारको शत प्रतिशत नै खेलाडीहरूलाई वितरण गर्ने व्यवस्थापक श्रेष्ठले जानकारी दिए ।