काठमाडौं (हाम्रो खेलकुद) – पेरिविंकल सर्भिसको आयोजनमा भोली शनिबार ढुकु फुटसल हबमा हुने तेस्रो रुस्लान ओपन फुटसल प्रतियोगितामा ३१ टोलीले प्रतिस्पर्धा गर्ने भएका छन् ।
सहभागी टोलीका प्रतिनिधिको उपस्थितिमा आज गरिएको टाइसिट ‘ड्र’मा सहभागी टोलीलाई ८ समूहमा विभाजन गरिएको पेरिविंकलका प्रमुख कार्यकारी अधिकृत दीपेश घलेले जानकारी दिए ।
सहभागी टोलीमध्ये ७ समूहमा ४ टोली छन् भने बाँकी एउटामा ३ टोलीले प्रतिस्पर्धा गर्नेछन् । समूह चरण लिगकम नकआउटका आधारमा हुनेछ । लिग कम नकआउटपछि हरेक समूहका शीर्ष दुई टोली प्रतियोगिताको क्वार्टरफाइनलमा पुग्नेछन् ।
एक दिने प्रतियोगिताको विजेताले उपाधिसहित १ लाख ५० हजार र दोस्रो टोलीले ८० हजार रुपैया प्राप्त गर्नेछन् । सेमिफाइनलमा पुग्ने दुई टोलीले समान ३५ हजार रुपैयाँ प्राप्त गर्नेछन् । त्यस्तै प्रतियोगिताका उत्कृष्ट खेलाडी, गोलकिपर, रक्षक र उच्च गोलकर्ता समान १५ हजार रुपैयाँ पाउनेछन् ।
