काठमाडौं (हाम्रो खेलकुद) – किक अफ फुटसल र सामाखुशी फुटसल समूह विजेताको रुपमा एन्फा रेडुबल राष्ट्रिय फुटसल च्याम्पियनसिपको क्वार्टर पाइनलमा प्रवेश गरेका छन् ।

राजधानीमा जारी प्रतियोगिता अन्तर्गत बुधबार स्तुपा फुटसल बौद्धमा भएको खेलमा किक अफले विजी फुटसलमाथि ९–६ को जित निकाल्दै समूह विजेता बनेको हो । समूह चरणको सात खेलमध्ये किक अफले पाँच खेलमा जित र १ हार र १ बराबरी खेलेको थियो । यस्तै समूह ‘बी’ मा सामाखुशी अपराजित रहँदै समूह विजेता बन्दै क्वार्टर फाइनलमा पुग्न सफल भयो । समूह चरणको अन्तिम खेलमा सामाखुशीले चौर रिक्रिएसनमाथि ६–४ को जित निकाल्यो ।

सामाखुशीले ६ खेलमा जित हात पार्दा एक खेल बराबरी खेलेको थियो । हरेक समूहका शीर्ष चार टोली क्वार्टरफाइनलमा प्रवेश गर्नेछन् । क्वार्टरफाइनलका खेलहरु बिहिबारबाट शुरु हुनेछन् । नेपालले अक्टोबर १३ देखि २२ तारिखसम्म इरानमा हुने एएफसी फुटसल च्याम्पियनसिपमा सहभागिता जनाउने प्रतियोगिताको खेलाडी छनोटको रुपमा हेरिएको प्रतियोगितामा विभिन्न १६ टिमले च्याम्पियनसिपमा लिग कम नकआउटका आधारमा प्रतिस्पर्धा गरिरहेको छ ।

च्याम्पियनसिपको विजेताले पाँच लाख प्राप्त गर्नेछन् । यस्तै उपविजेताले २ लाख ५० हजार प्राप्त गर्ने आयोजकले जनाएको छ । यस्तै उत्कृष्ट गोलरक्षक, डिफेन्स, फरवार्ड र मिडफिल्डर र प्रशिक्षकले समान २०–२० हजार प्राप्त गर्नेछन् ।