काठमाडौं (हाम्रो खेलकुद)- एक्सटेप किक अफ फुटसल र शंखमुल फुटसल राजधानीमा जारी एन्फा रेडबुल राष्ट्रिय फुटसल लिग च्याम्पियनसिपको उपाधिका लागि भिड्ने भएका छन् । चौर रिक्रिएसन सेन्टर बाँसबारीमा शुक्रबार भएको खेलमा शंखमुलले सामाखुशीलाई तथा एक्सटेप किक अफले एरिना फुटसल बौद्धलाई पराजित गर्दै उपाधि भिडन्त पक्का गरेका हुन् ।

पहिलो सेमिफाइनलमा शंखमुलले सामाखुशी फुटसलमाथि ८–२ को फराकिलो जित निकाल्दै उपाधि नजिक पुग्यो । प्रतियोगितामा अपराजित रहेको सामाखुशी सेमिफाइनलमा शंखमुलसँग भने निरिह देखियो । अघिल्लो वर्ष पनि शंखमुलले सामाखुशीलाई नै फाइनलमा पराजित गर्दै होम एण्ड अवेको आधारमा भएको रेडबुल फुटसल लिगको उपाधि जितेको थियो ।

यस्तै एक्सटेप किक अफ फुटसलले एरिना फुटसल बौद्धलाई ७–४ ले पराजित गर्दै शंखमुलसँगको फाइनलमा भेट पक्का गर्यो । नेपालले अक्टोबर १३ देखि २२ तारिखसम्म इरानमा हुने एएफसी फुटसल च्याम्पियनसिपमा सहभागिता जनाउने प्रतियोगिताको खेलाडी छनोटको रुपमा हेरिएको प्रतियोगिता विभिन्न १६ टिमले च्याम्पियनसिपमा लिग कम नकआउटका आधारमा भदौं १५ गतेबाट प्रतिस्पर्धा गरेको थियो ।

च्याम्पियनसिपको विजेताले पाँच लाख प्राप्त गर्नेछन् । यस्तै उपविजेताले २ लाख ५० हजार प्राप्त गर्ने आयोजकले जनाएको छ । यस्तै उत्कृष्ट गोलरक्षक, डिफेन्स, फरवार्ड र मिडफिल्डर र प्रशिक्षकले समान २०–२० हजार प्राप्त गर्नेछन्।