काठमाडौं (हाम्रो खेलकुद) – प्रदेश १ ले यू–१९ राष्ट्रिय क्रिकेट प्रतियोगितामा लगातार दोस्रो जित हात पारेको छ । बिहीबार प्रदेश १ ले कर्णाली प्रदेशलाई ७६ रनले पराजित गर्दै लगातार दोस्रो जितका साथ शीर्षस्थानमा छ ।

जितका लागि २ सय ४० रनको विजयी लक्ष्य पछ्याएको कर्णाली प्रदेश ३८ ओभरमा १ सय ६३ रनमा अल आउट भयो । कर्णालीका तल्लोक्रमका रुपक ढकालले ५० बलमा २ चौका र ५ छक्का सहित सर्वाधिक ४१ रन बनाए । मनिश थापाले २८ बलमा ४ चौका र २ छक्का सहित ३९ रनको योगदान दिए । आपनर विपिन रावल १०, प्रकाश जैशी र निदेश पुनले १२–१२ रन बनाए । ३३ बल खेलेका राज शाहले १ चौका र ३ छक्का सहित २४ रन बनाए ।

प्रदेश १ का तीव्र गतिका बलर श्रवण किस्कुले १० ओभरमा २ मेडन सहित ३४ रन खर्चेर सर्वाधिक ४ विकेट लिए । स्पिनर लव कामतले ७ ओभरमा २ मेडन सहित ३६ रन खर्चेर ३ विकेट लिए । गौरव कटवालले २ र दीपेश कंडेलले १ विकेट लिए ।

त्यसअघि मुलपानी क्रिकेट मैदानमा टस जितेर पहिला ब्याटिङ थालेको प्रदेश १ ले निर्धारित ५० ओभरमा २ सय ३९ रनमा अल आउट भएको थियो । प्रदेश १ का विवेक मेहताले ८२ बलमा ५ चौका र २ छक्का सहित सर्वाधिक ५९ रन बनाए । दीपक जोशी ११ बलमा १ चौका र ३ छक्का सहित २३ रनमा अविजित रहे । कप्तान अंकित सुवेदी ३३ बलमा ७ चौका सहित ३७, सोनु अन्सारी २४ र सोनु मण्डल २५ रनमा आउट भए । सुमित न्यौपाने १८, राकेश शाह र श्रवन किस्कुले १२–१२ रन बनाए ।

कर्णालीका अनुज चनारा, रुपक ढकाल र सन्दीप शाहीले २–२ विकेट लिए । कर्णालीले पहिलो खेलमा लुम्बिनी प्रदेशलाई १सय ४० रनको फराकिलो अन्तरले हराएको थियो । प्रदेश १ ले बागमतीलाई २६ रनले हराएको थियो । प्रदेश एक २ खेलमा ४ अंकका साथ शीर्ष स्थानमा छ ।