काठमाडौं (हाम्रो खेलकुद) – बंगलादेशकी सुमाया देवान र नेपालका युवराज विक युथ एथलेटिक्स च्याम्पियनसिपको यू २० का सर्वोत्कृष्ट खेलाडी चुनिएका छन् । एथलेटिक्स परिवार नेपालले आयोजना गरेको दुई दिने प्रतियोगिताको अन्तिम दिन मंगलबार सर्वोत्कृष्ट खेलाडी घोषणा गरिएको हो ।

गर्ल्सतर्फ सुमाया र ब्वाइजतर्फका युवराज दुवैको एक सय मिटर दौडका स्वर्ण पदक विजेता हुन् । युवराजले ११ सेकेण्ड र सुमायाले ११.८५ सेकेण्डमा दौड पूरा गरेकी थिइन् । यू १६ मा गर्ल्सतर्फ स्वागता खैजु र ब्वाइजतर्फ सुदीप थारु सर्वोत्कृष्ट चुनिए । स्वागता एक सय मिटर दौड र सुदीप लङजम्पका स्वर्ण पदक विजेता हुन् । स्वागताले १३.२२ सेकेण्डमा दौड पूरा गरेकी थिइन् । लङजम्पका पहिलो भएका सुदीपले ६.६८ मिटर नाघेका थिए ।

च्याम्पियनसिपको दोस्रो तथा अन्तिम दिन यू २० गल्र्स ८ सय मिटर दौडमा जुम्लाकी रामाया बुढाले स्वर्ण पदक जितिन् । अघिल्लो दिन ३ हजार मिटर दौडमा स्वर्ण जितेकी रामायाले ८ सय मिटर २ मिनेट २६.३६ सेकेन्डमा पूरा गरेकी थिइन् । त्यसमा बंगलादेशकी रुना नुर्सत जाहान (२ मिनेट ३०.०८ सेकेन्ड) ले रजत र सुस्मिता राई (२ मिनेट ३२.०३ सेकेन्ड) ले कास्य पदक जितिन् ।

यू २० ब्वाइज ८ सय मिटरमा कन्चनपुरका सञ्जीव नेपालीले स्वर्ण पदक जिते । उनले २ मिनेट ०३.९ सेकेन्डमा दौड पूरा गर्दै स्वर्ण पदक जितेका हुन् । बंगलादेशका मिहिबुल्लाह मोहम्मद खालिद (२ मिनेट ०३.९८ सेकेन्ड) ले रजत र कपिबस्तुका अजय पाण्डे (२ मिनेट ०६.६ सेकेन्ड) कास्य पदक प्राप्त गरे ।

यू २० गर्ल्सको १ सय मिटर दौडमा स्वर्ण र रजत दुवै बंगलादेशका खेलाडीले जिते । ११.८५ सेकेण्डका साथ सुमाया देवानले स्वर्ण र १२.१० सेकेण्डमा दौड पूरा गर्दै सोनिया अख्तरले रजत पदक जितिन् । दाङकी सिमा चौधरीले १३.८० सेकेन्डका साथ कास्य पदक जितिन् । यू २० ब्वाइज मा सर्वोत्कृष्ट युवराले स्वर्ण जितेको १ सय मिटर दाडमा नवलपरासीका सनिल देवान (११.२४ सेकेन्ड) ले रजत र बंगलादेशका नदिम मोहम्मद (११.२८ सेकेन्ड) ले कास्य पदक जिते ।

यू १६ ब्वाइज ८ सय मिटेर दौडमा बाग्लुङका बादल कार्कीले स्वर्ण पदक जिते । बादलले २ मिनेट ७.८४ सेकेन्डमा दौड पूरा गरेकी थिए । कपिलबस्तुका सुदीप थारु (२ मिनेट ११.१९ सेकेन्ड) ले रजत र काठमाडौंका आर्यन राई (२ मिनेट १२.२७ सेकेण्ड) ले कास्य पदक जिते ।
यू १६ ब्वाइज एक सय मिटर दौडमा वीरगन्जका आदर्शकुमार यादवले स्वर्ण पदक जिते । उनले ११.२४ सेकेन्डमा दौड पूरा गरे । तनहुँका प्रेमबहादुर थापा (११.४२ सेकेन्ड) ले रजत र कपिलबस्तुका शंकर चौधरी (११.९२ सेकेन्ड) ले कास्य पदक हासिल गरे ।

यू १६ गल्र्समा सर्वोत्कृष्ट भक्तपुरकी स्वागताले स्वर्ण पदक जितेको एक सय मिटर दौडमा वीरगन्जकी प्रिती परेल (१३.७५ सेकेन्ड) ले रजत र झापाकी विधा आचार्य (१४.१० सेकेन्ड) ले कास्य पदक प्राप्त गरिन् । यू १६ ब्वाइज ६० मिटर दौडमा तनहुँका प्रेमबहादुर थापाले स्वर्ण पदक जिते । उनले ७.४६ सेकेन्डमा दौड पूरा गरे । कपिलबस्तुका शंकर चौधरी (७.५२ सेकेन्ड) ले रजत र वीरगन्जका पुष्पराज यादव (७.५६ सेकेन्ड) ले कास्य पदक प्राप्त गरे ।

दशरथ रंगशालामा भएको च्याम्पियनसिपमा बंगलादेशका ८ तथा नेपालका ४५ जिल्लाका गरि ४ सय बढी खेलाडीको सहभागिता रहेको एथलेटिक्स परिवारले जानकारी दिएको छ ।