एजेन्सी – कोलकाता नाइट राइडर्सले इन्डियन प्रिमियर लिग (आइपिएल) २०२२ को २५ औं खेलमा सनराइजर्स हैदराबादलाई १ सय ७६ रनको प्रतिस्पर्धात्मक लक्ष्य दिएको छ ।

बे्रबोन स्टेडियम मुम्बईमा टस हारेर ब्याटिङको निम्तो पाएको कोलकाताले निर्धारित २० ओभरमा ८ विकेट गुमाउँदै १ सय ७५ रन बनायो । कोलकाताका नितिश रानाले ३६ बलमा ६ चौका र २ छक्कासहित सर्वाधिक ५४ रन बनाए ।

तल्लोक्रममा आन्द्रे रसेलले २५ बलमा ४ चौका र ४ छक्कासहित ४९ रनमा अविजित रहँदै आक्रामक इनिङ खेले । रसेलले अन्तिम तीन बलमा जगदिश सुचिथलाई दुई छक्का र एक चौका प्रहार गरेका थिए ।

ओपनर वेंकटेश ऐरलाई टि नटराजनले ६ रनमा बोल्ड आउट गरे । कोलकाताको लागि पहिलो खेल खेलेका ओपनर आरोन फिन्च मार्को ज्यानसनको बलमा ७ रनमा निकोलस पुरनबाट क्याच भए ।

श्रेयस ऐर २५ बलमा ३ चौकासहित २८ रन बनाए । ऐर उमरन मलिकको बलमा बोल्ड भए । सुनिल नारायण ६ र शेल्डन ज्याक्सन ७ रनमा आउट भए । हैदराबादका उमरन मलिकले ४ ओभरमा २७ रन खर्चेर २ विकेट लिए । टि नटराजनले ४ ओभरमा ३७ रन खर्चेर ३ विकेट लिए । मार्को ज्यानसन, भुवनेश्वर कुमार र जगदीश सुचिथले १-१ विकेट लिए ।

कोलकाता ५ खेलमा ३ मा जित र २ मा हार सहित ६ अंक जोड्दै दोस्रो स्थानमा छ । आजको खेलमा विजयी भएका शीर्ष स्थानमा उक्लिने छ । हैदराबाद ४ खेलमा २ मा जित र २ मा हार सहित ४ अंक जोड्दै आठौं स्थानमा छ । आजको खेलमा विजयी भएमा तेस्रो वा दोस्रो स्थानमा उक्लिनेछ । जुन नेटरनरेटमा निर्भर रहनेछ ।