काठमाडौं (हाम्रो खेलकुद) – अमेरिकाको लस भेगासमा आयोजना भएको युएसए ओपन एण्ड जुनियर इन्टरनेसनल कपमा नेपालले चार पदक जितेको छ ।

अमेरिकामै रहेका नेपाली खेलाडीले नै च्याम्पियन मार्सल आर्ट्स एकेडेमीबाट चार खेलाडीले नेपालको प्रतिनिधित्व गर्दा दुई खेलाडीले दोहोरो पदक जित्न सफल भएका हुन् ।

८–९ वर्षको उमेर समूहको ब्वाइजमा याङ्तेन लामाले दुई रजतपदक तथा १४–१५ वर्षको उमेर समूहको गल्समा याङजुम लामाले एक रजत र एक कास्यपदक जित्न सफल भएका हुन् । याङ्तेन फाइनलमा अमेरिकी खेलाडी रेमिरेज कालेउसँग ६–३ ले पराजित भए । यस्तै याङजुम फाइनलमा अमेरिकी खेलाडी नियाङ एमिनेतासँग ६–१ ले चुक्दा रजमा सीमित बनिन् ।

युएसए ओपन एण्ड जुनियर इन्टरनेसनल कप १३ देखि १७ मार्चसम्म लस भेगासस्थित नाभादामा भएको च्याम्पियनसिपको ६७ केजीमुनि विजय लामा र ७५ केजीमुनि हरि प्रसाद सेढाई पदकविहीन बने । यि चारै जना खेलाडी अमेरिका नै शाखाको रुपमा रहेको च्याम्पियन मार्सल आर्ट्स एकेडेमीको शाखामा प्रशिक्षण गर्ने गर्दछन् ।

टोलीको प्रशिक्षकमा सागका स्वर्णधारी सुनिल लामा रहेका थिए । अफिसियल रेफ्रीमा जनक सिंह खड्का र अफिसियलमा रोमा गुरुङ रहेका छन् । टोलीलाई लामा एकाउन्टिङका नाम्गेल लामाले प्रायोजन गरेका छन् ।