काठमाडौं (हाम्रो खेलकुद) – विभागीय टोलीद्धय नेपाल पुलिस क्लब र नेपाल एपिएफ क्लबले ‘बागमती प्रदेश न्यू डायमन्ड कप खुल्ला महिला राष्ट्रिय भलिबल प्रतियोगिता’ मा विजयी सुरुवात गरेका छन् ।

कीर्तिपुरस्थित मल्टी प्रजोज कभर्डहलमा मंगलबार भएको उद्घाटन खेलमा पुलिसले आयोजक न्यु डायमन्ड स्पोर्ट्स क्लबलाई ३–० को सोझो सेटमा पराजित गर्दै विजयी सुरुवात गरेको हो । पहिलो सेटमा २५–१६ को सहज जित निकालेको पुलिसले त्यसपछि दोस्रो र तेस्रो सेटमा समान २५–१५ र २५–१५ को जित निकाल्न सफल भयो ।

अर्काे खेलमा नेपाल एपिएफ क्लबले परोपकार आदर्श माध्यमिक विद्यालयमाथि ३–० को सोझो सेटमा जित निकाल्दै विजयी सुरुवात गरेको छ । एक पक्षीय खेलमा एपिएफले परोपकारमाथि २५–११, २५–४ र २५–३ को सोझो सेटमा जित निकाल्न सफल भयो । पहिलो सेटमा केही संघर्ष गर्नुपरेपनि एपिएफले त्यसपछि दोस्रो र तेस्रो सेटमा एकपक्षीय नतिजा निकाल्न सफल भयो ।

जितपछि पुलिस र एपिएफले समान ३ अंक जोडेका छन् । डायमन्ड र परोपकारले अंकको खाता खोल्न सकेका छैनन् । प्रतियोगितामा राष्ट्रिय टोलीको प्रशिक्षणमा रहेका २५ खेलाडीले खेलाडीले खेलेका छैनन् ।

प्रदेश खेलकुद विकास परिषद बागमती प्रदेश तथा न्यू डायमन्ड स्पोर्ट्स क्लबको संयुक्त आयोजनामा भइरहेको प्रतियोगितामा बुधबार दुई खेल हुनेछ । पहिला खेलमा पुलिस र परोपकार तथा दोस्रो खेलमा एपिएफ र न्यु डायमन्डबीच प्रतिस्पर्धा हुनेछ ।

शनिबारसम्म हुने प्रतियोगितामा आयोजक न्यू डायमन्ड स्पोर्टस् क्लबसँगै दुई विभागीय टोली नेपाल एपिएफ क्लब र नेपाल पुलिस क्लबसँगै परोपकार आदर्श माध्यविक विद्यालय काठमाडौं गरी चार टोलीको सहभागिता रहेको छ । खेलहरु राउन्ड रोविन लिगको आधारमा हुनेछ । राउन्ड रोविन लिगपछि शीर्ष दुई टोलीले उपाधिका लागि प्रतिस्पर्धा गर्नेछ । तेस्रो र चौथो हुनेले तेस्रो स्थानको लागि प्रतिस्पर्धा गर्नेछ ।

प्रतियोगिताको विजेताले ५ लाख रुपैयाँ, शिल्ड, मेडल र प्रमाणपत्र गर्नेछन्् । दोस्रो हुनेले २ लाख ५० हजार रुपैयाँ, शिल्ड, मेडल र प्रमाणपत्र गर्नेछन् । तेस्रो हुनेले १ लाख २५ हजार रुपैयाँ, शिल्ड, मेडल र प्रमाणपत्र तथा चौथो हुनेले ७५ हजार रुपैया र प्रमाणपत्र गर्नेछन् । प्रतियोगिताको सर्वाेत्कृष्ट खेलाडीले २५ हजार रुपैयाँ, ट्रफी र प्रमाणपत्र हात पार्नेछन् । अन्य विधागत उत्कृष्ट (स्पाइकर, सेटर, ब्लकर, सर्भर, डिफेन्डर र प्रशिक्षकले समान १० हजार रुपैया, ट्रफी र प्रमाणपत्र प्राप्त गर्नेछ ।

प्रतियोगिताको मुख्य उद्देश्य न्यू डायमन्ड स्पोर्ट्स क्लबको आफ्नै भलिबल कोर्ट निर्माण सहयोगार्थ रहेकाले पुरस्कार बापतको २० प्रतिशत दिनुपर्नेछ । यस प्रतियोगिताको अनुमानित बजेट ४० लाख रुपैया रहेकोमा प्रदेश खेलकुद विकास परिषद बागमती प्रदेशले २० लाख र बाँकी २० लाख न्यु डायमन्ड स्पोर्ट्स क्लबले बेहोर्नेछ ।