काठमाडौं (हाम्रो खेलकुद) – लुम्बिनीकी निशा चौधरीले १२ औं केन्द्रीय स्तरीय राष्ट्रपति रनिङ सिल्ड खेलकुद प्रतियोगिताअन्तर्गत एथलेटिक्सको लङजम्पमा राष्ट्रिय कीर्तिमान बनाएकी छिन् । निशाले सिनियरको राष्ट्रिय कीर्तिमान् बुधबार तोडे राष्ट्रिय खेलकुद परिषद् (राखेप) ले जनाएको छ ।

छात्रा लङजम्पमा निशाले ५.४७ मिटर जम्प गर्दै नयाँ राष्ट्रिय कीर्तिमान बनाएकी हुन् । यसअघि लङजम्पमा शिलाको कीर्तिमान थियो । उनले सन् २०१८ अप्रिल २३ मा ५.४५ मिटरको कीर्तिमान बनाएकी थिइन् । जुनियरमा भने यो स्पर्धाको कीर्तिमान विपना परियारको नाममा ५.०९ मिटर थियो । निशाले मंगलबार १ सय मिटर दौडमा पनि १२.५३ सेकेन्ड समय निकाल्दै जुनियर राष्ट्रिय कीर्तिमान बनाएकी थिइन् ।

राखेपको आयोजनामा त्रिपुरेश्वरस्थित दशरथ रंगशालामा निशासहित रेशु थारु, रामकुमारी थारु र सम्झना थारु सम्मिलित लुम्बिनी टोलीले ४ गुणा १ सय मिटर रिले ५४.२० सेकेन्डमा पूरा गर्दै जुनियर राष्ट्रिय कीर्तिमान बनाएको छ । यसअघि तत्कालिन पश्चिमाञ्चलको नामा ५४.४० सेकेन्डको कीर्तिमान थियो ।

जुनियरमै अर्को कीर्तिमान छात्र लङजम्पमा लुम्बिनीका सलिम देवानले बनाए । उनले ६.८४ जम्प गर्दै २०६५ मा भुवन महतोको नाममा रहेको ६.५३ मिटरको कीर्तिमान भंग गरे । यसै स्पर्धामा दोश्रो भएका लुम्बिनीका सुदिप थारुले पनि भुवनको कीर्तिमान उछिन्ने क्रममा ६.६५ मिटरको प्रदर्शन गरेका थिए ।

करातेमा बागमती टिम च्याम्पियन

करातेमा ४ स्वर्ण, ३ रजत र ४ कांस्य पदकसाथ बागमती टिम च्याम्पियन बनेको छ । २ स्वर्ण, ३ रजत र १ कांस्यसाथ सुदूरपश्चिम दोश्रो तथा गण्डकीले २ स्वर्ण, १ रजत र ४ कांस्य पदकका साथ तेस्रो भएको छ ।

गण्डकी र लुम्बिनी भलिबलको फाइनलमा

भलिबलको छात्रमा गण्डकीले कर्णालीलाई २५–१५ र २५–१७ तथा लुम्बिनीले सुदूरपश्चिमलाई २५–१४ र २५–१८ को सोझो सेटमा पराजित गर्दै फाइनलमा पुगे । छात्रामा लुम्बिनीले कर्णालीलाई २५–१० र २५–१३ तथा बागमतीले गण्डकीलाई २५–१४ र २५–१३ को सीधा सेटमा हराउदै फाइनल पुगेका छन् ।

तेक्वान्दोमा बागमती च्याम्पियन

तेक्वान्दोमा बागमती टिम च्याम्पियन बनेको छ । ४ स्वर्ण, १ रजत र २ कांस्य पदकका बागमती समग्रमा टिम च्याम्पियन बनेको छ । दोश्रो भएको लुम्बिनीले १ स्वर्ण तथा समान ३ रजत र कांस्य पदक जितेको छ । तेश्रो स्थानमा रहेको सुदूरपश्चिमले १ स्वर्ण पदक जितेको छ ।

छात्रा कबड्डीमा सुदूरपश्चिमलाई उपाधि

कबड्डीको छात्रामा सुदूरपश्चिमले उपाधि हात पा¥यो । ५ टिम सहभागी राउन्ड रोविन लिगमा सुदूरपश्चिमले शत प्रतिशत जित निकाल्दै उपाधि जितेको हो । सुदूरपश्चिमले ८ अंक जोड्यो । गण्डकी ६ अंकसाथ दोश्रो भयो । तेश्रो हुने टिमको बिहीबार टुंगो लाग्ने छ ।

लैनचौरस्थित राष्ट्रिय टेबलटेनिस प्रशिक्षण केन्द्रमा भएको छात्रको प्रतिस्पर्धामा समान ६–६ अंक जोडेका सुदूरपश्चिम र लुम्बिनीबीच उपाधि भिडन्त हुने भएको छ । छात्रमा पनि ५ टिम सहभागी छन् ।

उसुमा पनि बागमती नै विजेता

उसुमा पनि बागमती नै टिम च्याम्पियन बनेको छ । बागमतीले ३ स्वर्ण, २ रजत र ५ कांस्य पदक जितेको छ । राखेपको कभर्डहलमा २ स्वर्ण, ३ रजत र १ कांस्यसाथ सुदूरपश्चिम दोश्रो तथा कर्णालीले १ स्वर्ण पदकका साथ तेस्रो भएको छ ।