काठमाडौं (हाम्रो खेलकुद)– नवौं साधारण सभा रोक्न बाध्य भएको नेपाल ओलम्पिक कमिटी (एनओसी) को आयोजनामा दोस्रो नेसनल स्पोर्ट्स कंग्रेस शुक्रबार राजधानीमा सुरु भएको छ । एनओसीमा आबद्ध २६ संघका २/२ जना र अन्य खेलकुदसँग सम्बन्धित प्रतिनिधिहरुको सहभागिता रहेको कंग्रेसको उद्घाटन एनओसीका अध्यक्ष जीवनराम श्रेष्ठले उद्घाटन गरेका थिए ।

अध्यक्ष श्रेष्ठले आफ्नो नेतृत्वमा रहेको एनओसी नै अन्तर्राष्ट्रिय मान्यता प्राप्त रहेको दोहोराए । ‘एउटा देशमा एउटा सरकार हुन्छ ’ उनले भने, ‘त्यस्तै एनओसी पनि एउटै हुन्छ । राजनीतिमा विभिन्न देशमा छायाँ सरकारको अभ्यास छ, यहाँ पनि एनओसीको छाँया सरकार छ भने हामीलाई त्यसमा केही भन्नु छैन ।’

कंग्रेसका बारेमा चर्चा गर्दै श्रेष्ठले नेपाली खेलकुदको वर्तमान अवस्था, खेलकुद विकास कसरी गर्न सकिन्छ भन्ने विभिन्न अभ्यास र सरकारलाई ध्यानाकर्षण गराउनु पर्ने विषयमा छलफल हुने बताए । पूर्व खेलकुद मन्त्री पुरुषोत्तम पौडेलले खेलकुद ऐन प्रष्ट र समयानकुल नभएकोले समय समयमा एनओसी विवादमा परेको विचार राखे ।

नेपाल खेलकुद पत्रकार मञ्चका अध्यक्ष महेश आचार्यले स्पोर्टस् कंगे्रसले नेपाली खेलकुद विकासमा टेवा पोगोस् भन्ने कामना गरे । ‘विश्व खेलकुद कसरी चलेको छ भन्ने हाम्रा राष्ट्रिय संघका अध्यक्ष महासचिवले जान्नु पर्दछ ’ उनले भने ‘त्यसका लागि यो कंग्रेस सही ठाँउ बन्न सकोस् । ’

दुई दिन सम्म चल्ने कंग्रेसको पहिलो दिन ओलम्पिक मुभमेन्टको संरचना, मार्केटिङ, खेलकुदमा महिला शसक्तिकरण, स्पोर्टस् साइकोलोजी एन्ड मोटिभेसन, मिसन २०२० लगायतमा छलफल हुने एनओसीले जनाएको छ ।

अघिल्लो दिन साधारण सभा रोकिएपछि कंग्रेस पनि स्थगित हुने अशंका थियो । गृह मन्त्रालयको निर्देशनमा ललितपुर जिल्ला प्रशासन कार्यालयले बिहीबारको लागि तय भएको साधारण एनओसीलाई साधारण रोक्न लगाएको थियो । सर्वोच्च अदालतको निर्णय कार्यान्वयन गराउनु भन्दै निर्णय कार्यान्वयन शाखाको पत्रका आधारमा गृहले आफ्नो निकाय निर्देशन दिएको थियो ।

२०६७ मा सर्वोच्च अदालतको रुक्म शम्सेर राणा अध्यक्ष रहेको एनओसी वैद्यानिक रहेको निर्णय कार्यान्वय गरेको थियो । यद्दपी नेपालमा भने राणाकै नेतृत्वमा निर्वाचित समितिको निरन्तरता रहेको एनओसीलाई अन्तर्राष्ट्रिय मान्यता रहँदै आएको छ ।