भुटानमाथि नेपालको सहज जित

काठमाडौं (हाम्रो खेलकुद) – नेपालले माल्दिभ्समा जारी साबा महिला बास्केटबल च्याम्पियनसिपमा दोस्रो जित निकालेको छ ।

माल्दिभ्सको मालेमा बुधबार नेपालले तुलनात्मक रुपमा कमजोर भुटानमाथि ६५–२६ को सहज जित हात पारेको हो । नेपाललाई पहिलो क्वाटरमा भुटानले कडा चुनौती पेश गरेपनि बाँकी तीन क्वाटरमा भने चुनौती पेश गर्न सकेन ।

नेपाल पहिलो क्वाटरमा १२–१० ले अघि रह्यो । दोस्रो क्वाटरमा १६–५ ले अघि रहेको नेपालले तेस्रो क्वाटरमा १४–४ ले अघि रहँदै फराकिलो जिततर्फ अग्रसर बन्यो । निर्णायक तथा चौथो सेटमा २३–७ को फराकिलो अग्रता लिन नेपाल विजयी हुन सफल भयो ।

यसअघि नेपालले श्रीलंकालाई ५५–४९ ले हराउँदै पहिलो जित निकालेको थियो । नेपाल पहिलो खेलमा माल्दिभ्ससँग ५१–४७ ले पराजित भएको थियो ।

दक्षिण एसियाका ४ राष्ट्रको सहभागिता रहने च्याम्पियनसिपमा शीर्ष टोलीले उपाधि जित्नेछ । नेपालको उपाधि यात्रा भने अन्य टोलीको नतिजामा भर पर्नेछ । अब श्रीलंका र माल्दिभ्स तथा माल्दिभ्स र भुटानबीच खेल हुन बाँकी छ ।