पोखरा (हाम्रो खेलकुद) – गण्डकी प्रदेशमा भइरहेको नवौं राष्ट्रिय खेलकुद प्रतियोगिता अन्तरगत साइक्लिङको डाउनहिल विधामा पुरुष र महिलात दुवैतर्फको स्वर्ण विभागीय त्रिभुवन आर्मी क्लबले जितेका छन् ।

पुरुषतर्फ राजेश मगरले १४ सय मिटरको दुरी रहेको डाउनहिल १ मिनेट ४९‍.१० सेकेण्डमा पुरा गर्दै बिजेता बन्दै स्वर्ण जितेका हुन् ।

बागमती प्रदेशका निरभ श्रेष्ठले १ मिनेट ५२.१० सेकेण्डमा दुरी पुरा गर्दै रजत र एपिएफका प्रचित थापा मगरले १ मिनेट ५५.६९ सेकेण्डमा उक्त दुरी पुरा गरि कास्य जिते ।

महिलातर्फ पनि सोही दुरी नेपाल आर्मीकी निस्मा श्रेष्ठले २ मिनेट २३.५८ सेकेण्डमा पुरा गर्दै स्वर्ण पदक जितिन् । रजत पनि नेपाल आर्मीकै उषा खनालले जित्न सफल भइन् । खनालले २ मिनेट ३७.४५ सेकेण्डमा दुरी पुरा गरेकी थिइन् । त्यस्तै २ मिनेट ४०.०९ सेकेण्डमा दुरी पुरा गर्दै गण्डकी प्रदेशकी जमुना थापाले कास्य पदक जितिन् ।

साइक्लिङको डाउनहिलमा आर्मीले २ स्वर्ण, बागमती प्रदेश र आर्मीले समान १ रजत त्यस्तै गण्डकी प्रदेश र एफिएफले समान १ कास्य जित्न सफल भए ।

सात प्रदेश र तीन विभागिय गरि दश क्षेत्रबाट प्रतिस्प्रधा रहने साइक्लिङमा डाउन हिल, क्रस कन्ट्री, रोड रेस इन्डीभिजुअल टाइम ट्रायल र रोड रेस मास स्टार्ट विधा रहेको छ । भोली (आइतबार) पोखराको ड्यामसाइड नजिक रानीबनको ट्रयाकमा क्रस कन्ट्री विधामा प्रतिस्पर्धा हुनेछ ।