काठमाडौं (हाम्रो खेलकुद) – आयोजक नेपाल सितोरियो कराते डो संघ, स्वच्छन्द्र भैरव शाखा डोजोले प्रथम स्वच्छन्द्र भैरव नगरस्तरीय खुला कराते प्रतियोगिताको उपाधि शनिबार जितेको छ ।

चितलाङको हात्तीसार माँझगाउँमा भएको प्रतियोगितामा स्वच्छन्द्र भैरवले ८ स्वर्ण, ४ रजत र १४ कांस्य जित्यो । ५ स्वर्ण, ७ रजत र १३ कांस्यसाथ गोजुरियो दोश्रो भयो । तेश्रो स्थानको वज्र बाराहीले ५ स्वर्ण, ७ रजत र ७ कांस्य हात पा¥यो ।

प्रतियोगिताको पुरुषमा स्वच्छन्द्र भैरवका सलिन गमाल तथा महिलामा वज्र बाराहीकी बबिता बलामी उत्कृष्ट खेलाडी घोषित भए । स्वच्छन्द्र भैरव अनुशासित टिम पनि ठहरियो ।

विजेतालाई थाहा नगरपालिकाका मेयर विष्णु विष्ट, उपमेयर भरत गोपाली, आयोजक डोजोका प्रमुख एवं प्रतियोगिता संयोजक रोशन बलामीलगायतले एक कार्यक्रमबीच पुरस्कृत गरे ।

सो अवसरमा नवौं राष्ट्रिय खेलकुदअन्तर्गत करातेका स्वर्ण विजेता आशिष थापा र कांस्य विजेता सुविन खत्रीलाई सम्मान गरिएको थियो । पदक विजेताद्वय थाहा नगरपालिकाका हुन् ।

एकदिने प्रतियोगितामा पुरुषतर्फ १० र महिलामा ८ गरी १८ स्पर्धामा ३ सय ५० खेलाडीले प्रतिस्पर्धा गरेको आयोजकले जनाएको छ ।