काठमाडौं (हाम्रो खेलकुद) – एथलेटिक्स परिवार नेपालको आयोजनामा गोल्डेन एथलेटिक्स मिट र झिल्टुङ क्रस कन्ट्री दौड माघमा तथा धरान रन फागुनमा हुने भएको छ ।

आयोजक एथलेटिक्स परिवार नेपालले बिहीबार पत्रकार सम्मेलन गरी गोल्डेन एथलेटिक्स मिट माघ २० र २१ गते काठमाडौंको दशरथ रंगशालामा हुने जनाएको छ । गोल्डेन एथलेटिक्स मिटमा महिला र पुरुष तर्फ बिभिन्न २७ वटा ट्रयाक एण्ड फिल्ड ईभेन्टमा प्रतिस्पर्धा हुनेछ ।

जसमा महिला र पुरुष तर्फ १०० मिटर, २०० मिटर, ४०० मिटर, ८०० मिटर, १५०० मिटर, ५ हजार मिटर, १० हजार मिटर दौडसँगै लङजम्प, ट्रिपलजम्प, हाईजम्प, सटपुट र ज्याभलिन थ्रो समावेश गरिएको छ । ४ गुणा १०० मिटर दौड र नेपालमा पहिलेपटक ४ गुणा ४०० मिटर मिक्स रिले दौड़ हुनेछ ।

व्यक्तिगततर्फ प्रत्येक ईभेन्टमा प्रथम हुनेलाई ६ हजार, द्वितीय हुनेलाई ४ हजार र तृतीय हुने खेलाडीलाई २ हजार रुपैयाँ प्राप्त गर्नेछ । रिले दौडमा प्रथम हुने टिमलाई ८ हजार, द्वितीयलाई ६ हजार र तृतीयलाई ४ हजार प्रदान गरिनेछ । महिला तथा पुरुष तर्फ सर्वश्रेष्ठ खेलाडी र राष्ट्रिय कीर्तिमान कायम गर्ने खेलाडीलाई ६ हजारबाट पुरस्कृत गरिने छ ।

सातौं झिल्टुङ क्रसकन्ट्री दौड माघ १४ गते शनिबार हुनेछ । प्रतियोगिता नुवाकोटको वेलकोटगढी नगरपालिका वडा नम्बर ५ को आयोजना तथा एथलेटिक्स परिवारको प्राविधिक सहयोगमा सञ्चालन हुनेछ ।

प्रतियोगितामा १३.५ कि.मि. पुरुष तथा महिला, ४.५ किमिको खुल्ला जुनियर छात्र तथा छात्रा, स्थानीय छात्र, छात्रातर्फ ४.५ किमि, ४५ वर्ष माथिका स्थानिय पुरुषको ४.५ किमि,१३.५ किमि खुल्ला भेट्रान खुल्ला पुरुष, ४. ५ किमीको आमा समूह दौडमा गरी कुल १० ईभेन्टमा प्रतिस्पर्धा हुनेछ ।

प्रतियोगितामा विजयी हुने खेलाडीहरुलाई नगद पुरस्कार, पदक र प्रमाणपत्र प्रदान गरिनेछ । उक्त दौड प्रतियोगितामा करीव ५ सय खेलाडीहरले भाग लिने अनुमान गरीएको र प्रतियोगिताको अनुमानित खर्च १० लाख रहेको छ ।

भिल्टुङ दौड कोल्पुटारबाट सुरु भएर बेलिनी, छाप, राजओडार, खड्गाछाप, सालचौर हुँदै पुन कोल्पुटारमा आएर समापन हुनेछ । त्यस्तै फागुन १३ गते शनिबार धरानमा ११औं नेवा च्यारिटी रन, २०२३ धरान १० के रन आयोजना हुनेछ ।