काठमाडौं (हाम्रो खेलकुद) – गण्डकी प्रदेशको पुरुष भलिबल टोलीले पोखरामा जारी तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा विभागीय त्रिभुवन आर्मी क्लबमाथि रोमाञ्चक जित निकालेको छ ।
गण्डकीले साविकको विजेता आर्मीमाथि ३–२ को रोमाञ्चक र प्रतिस्पर्धात्मक जित निकालेको हो । पोखरा रंगशालास्थित भलिबल कोर्टमा बुधबार भएको खेलको पहिलो सेट गण्डकीले २३–२५ ले गुमाएको थियो । दोस्रो सेट २५–२३ ले जित्दै गण्डकी खेलमा फर्कियो । तेस्रो सेट पुन आर्मीले २५–२३ ले जित्दै खेलमा अग्रता बनायो ।
चौथो सेट गण्डकीले २५–२२ ले आफ्नो पक्षमा पार्दै खेललाई पाँचौ सेटमा लम्ब्याए । निर्णायक तथा पाँचौ सेटमा सुरुवातदेखि नै पछि परेको गण्डकीले १५–१३ ले जित्दै आर्मीलाई हराउन सफल भयो ।
यस जितसँगै गण्डकीले तीन खेलबाट ५ अंक बटुलेको छ । पराजित आर्मीको तीन खेलबाट ४ अंक छ । अपराजित एपिएफको ९ तथा पुलिसको २ तथा श्रीलंकाको १ अंक जोडेको छ । आज नै पुरुषतर्फ शीर्षस्थानमा रहेको एपिएफ र सेन्ट जोसेफबीच प्रतिस्पर्धा हुँदैछ ।
महिलातर्फ बुधबार एपिएफले आर्मीलाई २५–१७, २५–१६ र २५–१५ ले पराजित गरेको छ । यस्तै अर्काे खेलमा होङ्गान्जी न्यु डायमण्ड युथ स्पोर्ट्स क्लबले घरेलु टोली गण्डकी प्रदेशलाई १९–२५, २५–१५, २५–१४ र २५–११ ले पराजित गरेको छ ।
महिलातर्फ एपिएफ र होङ्गान्जी न्यु डायमण्ड युथ स्पोर्ट्स क्लबको जितसँगै सेमिफाइनल समिकरण पूरा भएको छ । अब सेमिफाइनलमा शीर्षस्थानमा रहेको एपिएफले पुछारमा रहेको गण्डकीसँग तथा दोस्रो स्थानमा रहेको आर्मी र तेस्रो स्थानमा रहेको न्यु डायमण्डबीच प्रतिस्पर्धा हुनेछ । दुवै सेमिफाइन बिहीबार हुनेछ । तेस्रो स्थानको खेल शुक्रबार तथा फाइनल शनिबार हुनेछ ।
