पोखरा (हाम्रो खेलकुद) – विभागीय नेपाल एपिएफ क्लबले तेस्रो टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगितामा पुरुषतर्फ अपराजित यात्रालाई निरन्तरता दिने क्रममा श्रीलंकाको सेन्ट जोसेफ वाज स्पोर्टस् क्लबलाई पराजित गरेको छ ।
लगातार चौथो जित निकाल्ने क्रममा एपिएफले सेन्ट जोसेफमाथि ३–० को सोझो सेटमा जित निकाल्न सफल भयो । यसअघि एपिएफले आर्मी, पुलिस र गण्डकीलाई पराजित गरेको थियो ।
पोखरा रंगशालास्थित भलिबल कोर्टमा बुधबार भएको खेलमा एपिएफले सेन्ट जोसेफमाथि तीनै सेटमा समान २५–२३, २५–२३ र २५–२३ को जित निकाल्यो ।
यस जितसँगै एपिएफ ४ खेलबाट १२ अंक बटुलेर श्रीर्षस्थानमा रहने पक्का भएको छ । यस हारसँगै ३ खेलबाट १ अंक बटुलेको सेन्ट जोसेफको अन्तिम चारमा रहने सम्भावना झिनो बनेको छ । गण्डकीको तीन खेलबाट ५ तथा आर्मीको ३ खेलबाट ४ अंक छ । पुलिसको ३ खेलबाटै २ अंक छ ।
अब सेन्ट जोसेफले अन्तिम चारमा रहन आफ्नो अन्तिम खेलमा गण्डकीलाई पराजित गरेरमात्र पुग्दैन अर्काे खेलमा आर्मीसँग पुलिस सोझो सेटमा पराजित हुनुपर्नेछ । पुरुषतर्फ राउन्ड रोविन लिगको अन्तिम खेलमा बिहीबार गण्डकी र सेन्ट जोसेफ तथा आर्मी र पुलिसबीच प्रतिस्पर्धा हुँदैछ ।
महिलातर्फ बिहीबार सेमिफाइनल खेल हुनेछ । सेमिफाइनलमा एपिएफ र गण्डकी तथा आर्मी र होङ्गान्जी न्यु डायमण्ड युथ स्पोर्ट्स क्लबबीच प्रतिस्पर्धा हुनेछ ।
