पोखरा (हाम्रो खेलकुद) – साविक विजेता विभागीय नेपाल एपिएफ क्लब लगातार दोस्रोपटक टाइगर कप राष्ट्रिय तथा अन्तर्राष्ट्रिय आमन्त्रित खुल्ला क्लब च्याम्पियनसिप महिला तथा पुरुष भलिबल प्रतियोगिताको महिलातर्फ च्याम्पियन बनेको छ ।

लगातार दोस्रोपटक च्याम्पियन बन्ने क्रममा एपिएफले साविकको उपविजेता त्रिभुवन आर्मी क्लबलाई ३–१ को सेटमा पराजित पराजित गर्दै उपाधि जित्न सफल भएको हो । एपिएफ अपराजित रहँदै च्याम्पियन बनेकाे हाे । एपिएफ पहिलो संस्करणको फाइनलमा पुलिससँग पराजित भएको थियो ।

पोखरा रंगशालास्थित भलिबल कोर्टमा शनिबार भएको फाइनलको पहिलो सेट एपिएफले २५–२० ले जितेको थियो । दोस्रो सेट २२–२५ ले गुमाएपनि एपिएफले त्यसपछिको दुई सेट २५–८ र २५–२२ जित्न सफल भयो । च्याम्पियन बनेसँगै एपिएफले ५ लाख रुपैयाँ प्राप्त गरेको छ । दोस्रो भएको आर्मीले २ लाख ५ हजार रुपैयाँ प्राप्त गर्नेछ ।

घरेलु टोली गण्डकी प्रदेशलाई ३–० को सोझो सेटमा पराजित गर्दै होङ्गान्जी न्यु डायमण्ड युथ स्पोर्ट्स क्लबले तेस्रो स्थान हासिल गरेको छ । तेस्रो भएको डायमण्डले १ लाख २५ हजार चौथो भएको गण्डकीले ६५ हजार रुपैयाँ प्राप्त गर्नेछ ।

पुरुषतर्फ आर्मीलाई ३–१ को सेटमा पराजित गर्दै पुलिसले तेस्रो स्थान हासिल गरिसकेको छ । पुरुषतर्फको फाइनल केहीवेरमा हुनेछ । दुवैतर्फको सर्वोत्कृष्ट खेलाडीले जनही २५ हजार तथा विधागततर्फका उत्कृष्टले समान १० हजार प्राप्त गर्नेछन् ।