पोखरा (हाम्रो खेलकुद)– साविक विजेता लक्ष्मी हुन्डाई मनाङ मस्याङ्दीले आहा रारा गोल्डकप फुटबल प्रतियोगिताको क्वार्टरफाइनलको पहिलो हाफमा २–० को अग्रता लिएको छ ।
कप्तान अनिल गुरुङले महत्वपूर्ण भूमिका निर्वाह गरेपछि मनाङले अग्रता बनाएको हो । ३३ औं मिनेटमा सुजल श्रेष्ठको गोलका लागि पास मिलाएका राष्ट्रिय टोलीका समेत कप्तान रहेका अनिलले ४१ औं मिनेटमा गोल गरेका थिए । उनको क्रसमा सुजलले हेडमार्फत गोल गरेका थिए । दुई महिनाअघि सुजलले फाइनलमा गोल गरेपछि नेपालले एएफसी सोलिडारिटी कप जितेको थियो । अनिल आफैले आफिज ओलावालेको पासमा पहिलो बारमा गोल गर्दै घरेलु मैदानमा यो सिजनको पहिलो खेललाई सुखद बनाएका थिए ।
उपाधि रक्षाको लक्ष्यका साथ पोखरा आइपुगेको मनाङले गत महिनाको सुरुआतमा सुदूरपश्चिमाञ्चल खप्तड गोल्डकप जितेको थियो । त्यसअघि टोलीले टुबोर्ग हेटौडा गोल्ड कपको फाइनल खेलेको थियो ।
