काठमाडौं । नेपाल युथ स्पोर्टस् क्लब (एनवाईएसी) ले प्रथम पर्वत कप पुरुष भलिबल च्याम्पियनसिप २०२४ को उपाधि जितेको छ ।

तोडा सिटी स्पोर्टस् सेन्टर जापानमा शनिबार भएको फाइनलमा गल्काेट घुम्टे युवा परिवार जापानलाई पराजित गर्दै एनवाईएससीले उपाधि जित्न सफल भएको हो । पछिल्लो एक महिनामा एनवाईसीको यो दोस्रो उपाधि हो । यसअघि एनवाइएससीले तेस्रो घुम्टे कपको उपाधि जितेको थियो ।

यसपटक एनवाइएससीलाई च्याम्पियन बनाउन पछिल्लो समय नेपालको घरेलु भलिबलमा चर्चित रहेका रेशम छन्त्यालसँगै तोरण चन्द ठकुरीले उच्च प्रदर्शन गरे । रेशम प्रतियोगिताको उत्कृष्ट सर्भर समेत चुनिए ।

प्रतियोगिताको विजेता एनवाईएससीले उपाधिसँगै ३ लाख ५५ हजार ५ सय ५५ जापानी येन, च्याम्पियन ट्रफी, मेडल र प्रमाण पत्र प्राप्त गरेको छ । दोस्रो भएको घुम्टेले २ लाख २२ हजार २ सय २२ येनसँगै ट्रफी, मेडल र प्रमाणपत्र पाएको छ । तेस्रो भएको गल्कोट स्पोर्टस् क्लब टोकियोले १ लाख ११ हजार १ सय ११ येन र प्रमाणपत्र प्राप्त गरे ।

गल्काेट घुम्टे युवा परिवारका सरण सामरी क्षेत्री प्रतियोगिताकाे सर्वाेत्कृष्ट खेलाडी चुनिए । गल्कोट स्पोर्टस् क्लबका राजेन्द्र विष्ट उत्कृष्ट स्पाइकर, पर्वतका निलम सिह उत्कृष्ट ब्लकर, एनवाइएससीका मनोज भण्डारी उत्कृष्ट सेटर, एनवाइएससीका रेशम छन्त्याल उत्कृष्ट सर्भर, घुम्टेका सन्दिप थापा उत्कृष्ट लिवेरो र एनवाइएससीका केशव सुवेदी उत्कृष्ट प्रशिक्षक चुनिए । उनीहरु सबै सम्मानपत्रद्धारा सम्मानित भएकाे जापानबाट जीवन खड्का क्षेत्रीले जानकारी गराए ।

पर्वत समाज जापानको आयोजनामा भएको एक दिने प्रतियोगितामा नेपाली समुदायका विभिन्न ९ टोलीको सहभागिता रहेको थियो । खेल नकआउटको आधारमा भएको थियो ।