पोखरा (हाम्रो खेलकुद)– आफ्नो मुख्य स्पाइकरद्धय सरस्वती चौधरी र निरुता ठगुन्नाविनै कोर्टमा उत्रिएको विभागीय नेपाल एपिएफ क्लब लामाचौर कप राष्ट्रिय भलिबलको महिलातर्फ च्याम्पियन बनेको छ ।

एपिएफले शुक्रबार भएको फाइनलमा टिप टप न्यु डायमण्ड युथ स्पोर्ट्स क्लबलाई ३–१ को सेटमा पराजित गर्दै च्याम्पियन बन्न सफल भएको हो ।

यससँगै एपिएफले समूह चरणमा भोगेको हारको बदला लिन सफल भएको छ । एपिएफ समूह चरणमा ३–० को सोझो सेटमा पराजित भएको थियो ।

नव आदर्श सामुदायिक विकास समाजको आयोजनामा पोखरा १९ लामाचौरस्थित इन्द्रराज्य लक्ष्मी माविको खेल मैदानमा भएको खेलको पहिलो सेट एपिएफले २५–२३ ले आफ्नो पक्षमा पार्न सफल भयो ।

१२–१८ ले पछि रहेपनि एपिएफले संगठित प्रदर्शन गर्दै खेललाई १६–२१ को स्थितिमा ल्याए । २१–२१ को बराबरीबाट अग्रता लिदै एपिएफले जित निकाल्यो । दोस्रो सेटमा पनि एपिएफले पछि परेको स्थितिबाटै जित निकाल्यो । १६–१८ ले पछि रहको एपिएफले १९–१९ को बराबरीबाट अग्रता बढाउँदै २५–२३ कै जित निकाल्यो ।

तेस्रो सेटमा भने डायमण्डले आफ्नो लय फर्काउने कोशिस गर्यो । १३–९ को स्थितिमा सुमित्रा रेग्मीले एक ब्लक र सर्भिसबाटै ६ अंक बटुलेपछि न्यु डायमण्डले २०–९ को अग्रता लिदै जितको आधार तय गर्यो । त्यसपछि डायमण्डले २५–१३ को सहज जित आत्मसात गर्यो ।

चौथो सेटमा डायमण्डको प्रदर्शन बिर्सनलायक बन्यो । ८–१० ले पछि परेको स्थितिमा डायमण्डले केवल २ अंक मात्रै बटुल्न सफल हुँदा एपिएफलाई १०–२५ ले सेटसँगै ट्रफी पनि सुम्पियो ।

उपाधिसँगै एपिएफले १ लाख ५० हजार १ सय ११ रुपैयाँको साथमा शिल्ड, मेडल र प्रमाणपत्र हात पारेको छ । न्यु डायमण्डले १ लाख १ सय ११ रुपैयाँमा चित्त बुझायो । पुरुषतर्फको फाइनल भने खराव प्रकाशका कारण रोकिएको छ । दुवै टोलीले समान एक–एक सेट जितेको थियो ।

प्रतियोगितामा दुवैतर्फ समान ४ टोली छन् । नव आदर्श विकास समाजको २८औं वार्षिकोत्सव तथा तीजको अवसरमा इन्द्रराज्य लक्ष्मी माविको खेल मैदानमा भएको महिलातर्फको ११ औं संस्करण र पुरुषतर्फ तेस्रो संस्करण हो । ११औं संस्करणसम्म आइपुग्दा एपिएफ र डायमण्डले समान चारपटक तथा पुलिसले तीनपटक उपाधि जितेको छ ।

४ टोली सहभागी प्रतियोगितामा महिलातर्फ एभरेष्ट भलिबल क्लब बुटवल र पुरुषमा ट्राभल इन्क्वाइरी गल्कोटले तेस्रो स्थान हासिल गरेको छ ।

एभरेस्टले गण्डकी प्रदेश भलिबल संघलाई तथा गल्कोटले पनि साविक विजेता गण्डकीलाई नै समान ३–० को सोझो सेटमा हराउँदै तेस्रो स्थान हासिल गरेको हो । तेस्रो बनेको एभरेष्ट र गल्कोटले ५० हजार ११ रुपैयाँको साथमा शिल्ड, मेडल र प्रमाणपत्र प्राप्त गरेको छ ।